Саха сиригэр хааччахтыыр миэрэлэр балаҕан ыйын 30 күнүгэр диэри уһатылыннылар

Атырдьах ыйын 30 күнүнээҕи Ил Дархан Айсен Николаев Ыйааҕынан коронавируснай инфекцияны тарҕаппат сыаллаах хааччахтыыр миэрэлэр 2021 сыл балаҕан ыйын 30 күнүгэр диэри уһатылыннылар. Ол туһунан Саха сирин баһылыгын уонна бырабыыталыстыбатын пресс-сулууспата иһитиннэрдэ.
Хааччахтааһын миэрэлэрэ коронавируснай инфекцияттан (COVID-19) нэһилиэнньэни харыстыыр санитарнай-эпидемиологическэй ирдэбиллэри тутуһар сыаллаах киллэриллэр. 
Билиҥҥи кэмҥэ өрөспүүбүлүкэҕэ коронавируснай инфекцияны кытта сибээстээх санитарнай-эпидемиологическэй быһыы-майгы уустугунан хаалар. 
СӨ Роспотребнадзорын Управлениетын информациятынан,  атырдьах ыйын 30 күнүнээҕи туругунан өрөспүүбүлүкэҕэ коронавируһунан ыалдьыы 143 саҥа түбэлтэтэ биллибит, ол иһигэр Дьокуускай куоракка – 85.
Саха сирин нэһилиэнньэтин вакцинациялааһын салҕанар. Барыта 418 555 дуоза вакцина кэлбит. Саха сирин 290 тыһыынча олохтоохторо вакцинация толору кууруһун ааспыттар.