Сааскы халаан уутун хачайдааһын салҕанар

Санитарнай ыраастаныы үс ыйын чэрчитинэн киин куорат суолларын намыһах сирдэриттэн, кыбаарталлар территорияларыттан халаан уутун хачайдаан оботтороллор. Бу туһунан Олохтоох дьаһалта пресс-сулууспата иһитиннэрдэ.

«Жилкомсервис» МУТ информациятынан, билиҥҥи туругунан куорат суолларыгар ууну хачайдааһыҥҥа күн аайы 4-5 ассенизаторскай массыына үлэлиир. Наада буоллаҕына, тиэхиньикэ ахсаана элбиэхтээх.

Муус устар 11 күнүгэр Сэргэлээхтиир шоссеҕа 3-с №-дээх поликлиника оройуонугар, Пирогов уулуссатыгар, Октябрьскай уонна Ойуунускай уулуссаларын быһа охсуһуутугар, Хабаров уулуссатыгар 40 кубометр уу хачайданна. Оботторуллубут ууну Сэбиэскэй Аармыйа 50 сыла уулуссаҕа баар ыстаансыйаҕа сүөкүүллэр.

Күн аайы «Жилкомсервис» МУТ уу мустар сирдэрин кэтээн көрөр уонна бэдэрээтчит тэрилтэлэр ууну оботтороллорун хонтуруоллуур. Кыбаарталлар тиэргэннэриттэн ууну салайыы территориальнай уорганнара, салайар хампаанньалар уонна ТСЖ хачайдыыллар. 

«Якутдорстрой» АУо күн ахсын турбалары паардыыр, халаан уутун ыытар, уу сүүрэр лотуоктарын ыраастыыр, өрөмүөннүүр, чөлүгэр түһэрэр.