30.04.2022 | 14:00

Саҥа киинэни күүтэбит

Саҥа киинэни күүтэбит
Ааптар: Киин Куорат
Бөлөххө киир

2022 сыл бэс ыйын 2 күнүгэр саха киинэлэриттэн биир саамай күүтүүлээхтэрэ – режиссер Валентин Макаров «Дьулуур: мас-рестлинг» спортивнай драмата киэҥ экраҥҥа тахсаары турар.

Сүрүн оруолларга Саха тыйаатырын артыыстара Гаврил Менкяров уонна  Иннокентий Луковцев оонньууллар. Ону сэргэ бырайыакка артыыстар Владимир Епифанцев, Айталина Лавернова, Владимир Михалев, Роман Дорофеев уо.д.а. кытыннылар.

Киинэ сценарийын Мария Находкина, Валентин Макаров, Любовь Борисова кыттыылаах Дарья Серенко суруйда, оператор – Семен Аманатов, композитор – Моисей Кобяков, продюсердар – Филипп Абрютин, Оксана Лахно уонна  Иннокентий Луковцев.

Киинэҕэ сүрүн саундтрегы саха омугун биир талааннаах ырыа айааччыта, ырыаһыт Jeedda толорор. «Дьулуур» трегэ хайыы-үйэ Яндекска таҕыста. Муусуканы Яндекска, «ВКонтакте» уонна «Тэтим», «Сахалыы Виктория» араадьыйа долгуннарыгар истиэххэ сөп. Киинэ туһунан буруолуу сылдьар сонуннары телеграмҥа «Аныгы саха киинэтэ” ханаалга билэ-көрө, ааҕа олорор кыах баар.

Сыл бастыҥ киинэтинэн билиниллибит «Дьулуур: мас рестлинг” киинэ кылгас ис хоһоонун кэпсээтэххэ, Дьулуур – аармыйаҕа сулууспалаан баран, Саха сиригэр төрөөбүт дэриэбинэтигэр төннүбүт эдэр уол.  Кини манна кырдьаҕас эбэтин уонна кыра балта Күннэйи кытары олорор. Түгэн тосхойон, Дьулуур күрэхтэһиилэргэ кыттар уонна мас тардыһыытыгар дьоҕурдааҕын билэр. Ол гынан баран чугас киһитин өлүүтэ инники былаанын барытын туора сотон кэбиһэр. Дьулуур кырачаан балтын Күннэйи быыһыыр биир эрэ суоллаах – мас тардыһыы чемпионатыгар кыайдаҕына. Эрчиллиилэр, күөн көрсүһүүлэр, ыарыы, эчэйии уонна кутталы туорааһын – Дьулуур барытыгар бэлэм.

Кини  бэйэтигэр халбаҥнаабат сыал-сорук туруорунар – кырачаан балтын бэйэтэ иитэр кыахтанар, кини аттыгар бииргэ буолар туһуттан, кыайыы өрөгөйүн ситиһиэхтээх. Ол уустук суолугар уол үгүс тургутууну, эрэйи-муҥу туоруурга күһэллэр.

Киинэни продюсер быһыытынан «Эдэр ыччат көҕүлээһиннэрэ» («Молодежные инициативы») «Скаzка» киинэ хампаанньатын,  «Ayar aat» айар холбоһугу, РФ Култуураҕа министиэристибэтин өйөбүлүнэн «Сахафильм» киинэ устуудьуйатын кытары бииргэ уһулла. «Дьулуур: мас-рестлинг» — РФ Култуураҕа министиэристибэтин өйөбүлүнэн уһуллубут саха бастакы киинэтэ. Ону таһынан, хартыына уһулларыгар Мас тардыһыы федерацията уонна Саха сирин бырабыыталыстыбата көмөлөстүлэр. Киинэ «Пушкин каартата» бырагыраама кыттыылааҕа буолар.

Быракаакка тута икки тылынан: сахалыы уонна нууччалыы тахсар.

 

Сонуннар

Ордук ааҕаллар

Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ийэлиин кэпсэтии...
Сонуннар | 16.02.2024 | 18:30
Ийэлиин кэпсэтии...
Анал байыаннай дьайыы тиэмэтин суруйарбар төрөппүтү, ийэни, аҕаны кытта кэпсэтэр ордук ыарахан. Кэпсэтэ олорон бөтө бэрдэрэн, оҕотун санаан, аһынан тохтоон, хараҕын уутун соттон, ол быыһыгар, кини туһунан кэпсиэхтээҕин, кини дьоруойун бар дьон билиэхтээҕин санаан, күүстээх санаатын, тулуурун киллэрэн эмиэ саҥарбытынан барар. Биир сөҕөрүм диэн, маннык кэпсэтиилэргэ биир да төрөппүт, уолаттар...
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.