Саҥа алмааска биллиилээх агроном аатын иҥэрдилэр

Быйыл, олунньу 25 күнүгэр Заполярная диэн туруупкаттан булуллубут 62,60 караттаах алмааска АЛРОСА Социалистическай үлэ Дьоруойа Екатерина Новгородова аатын иҥэрдэ. 
Биллиилээх агроном-овощевод Екатерина Иннокентьевна Новгородова 1929 сыллаахха Чурапчы оройуонун Кытаанах нэһилиэгэр төрөөбүтэ. Кини Мэҥэ-Хаҥалас оройуонун Ленин аатынан колхуоһугар үлэлээбитэ уонна итини сэргэ Дьокуускайдааҕы салайар каадыр тыа хаһаайыстыбатын оскуолатын бүтэрбитэ. Агрономунан үлэтин 1957 сыллаахтан Ленин аатынан Мэҥэ-Хаҥаластааҕы колхуоска саҕалаабыта. Кини бочуоттаах сынньалаҥҥа тахсыар диэри, 30-н тахса сыл колхуоска уонна сопхуоска оҕуруот аһын биригээдэтин салайааччытынан үлэлээбитэ.  Килбиэннээх үлэтэ үрдүктүк сыаналанан 1973 сыллаахха Екатерина Иннокентьевнаҕа Социалистическай Үлэ дьоруойун аата иҥэриллибитэ.
Екатерина Новгородова көҕүлээһининэн Ленин аатынан сопхуос өрөспүүбүлүкэҕэ аан маҥнайгынан парниктары электричество көмөтүнэн сылытар буолбута, маны таһынан, оҕуруот аһын үүннэриитигэр саҥа технологиялары туттубута.  Новгородова биригээдэтэ сылтан сыл үлэтэ улам таһаарыылаах буолан испитэ.
Биллиилээх агроном Екатерина Иннокентьевна Новгородова оҕуруот аһын үүннэриитигэр уһулуччу ситиһиилэрин иһин, Үлэ Кыһыл Знамятынан, Ленин, Өктөөп өрөбөлүүссүйэтин уордьаннарынан уонна «Серп и молот» кыһыл көмүс мэтээлинэн наҕараадаламмыта. Кини – ССРС VIII-XI ыҥырыытын дьокутаата, Саха Өрөспүүбүлүкэтин бочуоттаах олохтооҕо.