02.06.2022 | 19:00

Үөрэнэргэ, олорорго, сайдарга усулуобуйа барыта баар!

Үөрэнэргэ, олорорго, сайдарга усулуобуйа барыта баар!
Ааптар: Айыына КСЕНОФОНТОВА
Бөлөххө киир

Намнааҕы техникум 1963 сыллаахха Граф Биэрэгэр тэриллибитэ. Күн бүгүн 10 тыһыынчаттан тахса выпускник үөрэх кыһатыттан куорсун анньынан, исписэлиис аатын ылан, өрөспүүбүлүкэ араас муннуктарыгар үлэлии-хамсыы сылдьар.

Техникум бу үөрэх дьылын 258 устудьуоннаах түмүктээн эрэр. Ол курдук, 4 бөлөх 11 кылаас кэнниттэн киирбит, 10 бөлөх – 9 кылаас кэнниттэн. Манна оҕолор “Повар-кондитер”, “Мастер общестроительных работ”, “Мастер по ремонту и обслуживанию автомобилей”,  “Сварочное производство”, “Технология мяса и мясного производства”, “Техническое обслуживание и ремонт двигателей систем агрегатов” уо.д.а. идэлэргэ уһуйуллаллар. Быйыл орто анал үөрэх кыһатын 4 бөлөх бүтэрэр.

Уопсай, босхо итии аһылык, истипиэндьийэ, бириэмийэ!

Устудьуоннар икки куорпуһунан үөрэнэллэр. Биллэн турар, практическай сатабыл хайаан да наада, онон оҕолор анал мастарыскыайдарга уһуйуллаллар. Остолобуойдарыгар күҥҥэ үстэ итии аһылыгынан босхо аһаталлар. Техникум толору хааччылыылаах икки уопсайдаах. Спортивнай саалалаах, библиотекалаах. Суоппар, механик идэтигэр үөрэнээччилэргэ анаан автодром, гараас баар.

Эргиччи “4”, “5” сыанаҕа үөрэнэр оҕолор академическай истипиэндьийэни ылаллар. Маны сэргэ, кыаммат ыаллар оҕолоругар социальнай истипиэндьийэ көрүллэр. Үчүгэйэ диэн, ый аайы бастыҥ көрдөрүүлээх, көхтөөх, ситиһиилээх устудьуоннарга бириэмийэ төлөнөр. Онон үөрэҕигэр кыһаллар, техникум уопсастыбаннай олоҕор көхтөөх, араас таһымнаах тэрээһиннэргэ үөрэх кыһатын чиэһин көмүскүүр устудьуон өрүү далбарга сылдьар. 

Билиини биэрэбит, сатабылга уһуйабыт

Ньургустан Михайлович Жирков, дириэктэр:

– Биһиги устудьуоннарбыт теорияны уонна практиканы дьүөрэлээн үөрэнэллэр. Ол иһин производствоҕа үлэлии тиийдэхтэринэ, ыарахаттары көрсүбэттэр. Практикаларын араас тэрилтэлэргэ бараллар. Оҕолору харахпыт далыгар илдьэ сылдьан үөрэтэбит, онон маастардар тэҥҥэ сылдьыһаллар. Ол курдук, сварщикка, уопсай тутуу маастарыгар үөрэнэр устудьуоннарбытын “Прогресс”, “Нам строй”, “Уйгу” уо.д.а. бөдөҥ тэрилтэлэргэ ыытабыт. Билигин түөрт нэһилиэккэ социальнай эбийиэктэри тутууга үлэлии сылдьаллар. Итинник икки-үс нэдиэлэ хоно сытан билиилэрин чиҥэтэн кэлэллэр. Онно поварга үөрэнэр аҕыйах оҕо эмиэ практикатын ааһар. Манна даҕатан эттэххэ, бу идэҕэ уһуйуллар оҕолор остолобуойдарга, кафеларга үлэлии бараллар. Практикаҕа бэйэлэрин үчүгэйдик көрдөрбүт устудьуоннары сорох тэрилтэлэр тута үлэҕэ ыҥыраллар. Онон оҕолор үлэ булан, устунан хаалар түгэннэрэ элбэх. Үгүс выпускникпыт салгыы үрдүк үөрэххэ киирэр. Холобур, ХИФУ Автодорожнай факультетын, АГАТУ устудьуоннара буолаллар.

Бэлиэтээн эттэххэ, “Рыбовод” уонна “Мастер садово-паркового и ландшафтного строительства” диэн сонун уонна билиҥҥи үйэҕэ, экология боппуруоһа сытыытык турар кэмигэр, олус наадалаах идэлэри киллэрбиппит. Техникум “Рыба Якутии” тэрилтэни уонна Хаҥалас Уулаах Ааныгар баар собуоту кытта дуогабар түһэрсэн үлэлиир. Онон идэлэрин толору баһылаабыт исписэлиистэр үөрэнэн, үүнэн тахсыахтара диэн бигэ эрэллээхпит.   

Оҕолорбут олоххо бэлэмнээх буолалларыгар кыһаллабыт. Онон быйылгы сылга үөрэххэ киирбиттэри “В” эбэтэр “С” категорияҕа босхо үөрэтэр санаалаахпыт. Онон оҕолор талбыт категорияларыгар үөрэнэн, суоппар быраабын ылан тахсар кыахтаахтар. 

Аны туран, оҕону илиигинэн-атаххынан көрдөрөн, этэргэ дылы, кыһыл тылгынан үөрэппэккин. Онон оборудование атыылаһыыга үгүс үбү көрөбүт. Туттар тэрилбит, тээбириммит барыта тупсаҕай, аныгы ирдэбилгэ эппиэттиир. Онон аккредитацияны ааһан, “WorldSkills Russia” чемпионат демо эксээмэнин ыытар кыаҕы ылбыппыт.  

Күндү абитуриеннар! Биһиги техникуммутугар туттарсаргытыгар ыҥырабын. Үрдүк кылаастаах исписэлиистэрбит, маастардарбыт талбыт идэҕитигэр уһуйуохтара, элбэх билиини уонна сатабылы биэриэхтэрэ.  Остолобуойбут үлэһиттэрэ сылаас аһынан хааччыйыахтара, уопсайбытыгар олорор усулуобуйа барыта баар.

 

Быстах куурустарга ыҥырабыт

Техникум бэкээринэтин нэһилиэнньэ хайгыыр. Ол курдук, икки оскуоланы, үс уһуйааны килиэбинэн хааччыйар, маҕаһыыннарга атыыга туттарыллар. Граф Биэрэгин килиэбэ өр турбат, хамаҕатык барар.

Маны таһынан, Намнааҕы техникум кылгас болдьохтоох төлөбүрдээх куурустары ыытар, 40-ча идэҕэ уһуйар лицензиялаах. Ол курдук, суоппар, повар-кондитер, судоводитель, сварщик, парикмахер уо.д.а. үөрэҕэр суруйтарыахха сөп.

Иитэр үлэҕэ – ураты болҕомто

Билигин техникум 91 үлэһиттээх, онтон 41-рэ – педагог. Ол курдук, куратордар, уопсайга баспытааталлар, психолог, социальнай педагог иитэр үлэҕэ ураты болҕомтолорун уураллар.

Марианна Семеновна Васильева, иитэр үлэҕэ дириэктэри солбуйааччы:

– Оҕолор иллэҥ кэмнэрин саалаҕа атааралларын ордороллор. Ону учуоттаан, спортивнай секциялары элбэппиппит. Онон талбыт көрүҥнэринэн дьарыктаныахтарын сөп: волейболунан, футболунан, фитнеһинэн, боксанан уо.д.а. Маны сэргэ, эбии дьарыктар тэриллэллэр. Үксүн бэйэбит педагогтарбыт, маастардарбыт үөрэтэллэр.  Ол курдук, устудьуоннар бэйэлэрин идэлэринэн куруһуоктарга сылдьаллар. Ону таһынан, олоххо-дьаһахха наадалаах дьарыктар бааллар. Холобур, кыргыттар “Сиэлтэн сиэттэрэн” куруһуокка сөбүлээн сылдьаллар. Билиҥҥи кэмҥэ олус туһалаах “Финансовая грамотность” куруһуок үгүс оҕо сэҥээриитин ылла.  Устудьуоннарбыт  “Факел” байыаннай-патриотическай, музейнай куруһуокка сылдьан, элбэҕи билэллэр-көрөллөр.

Е.Ф. Евсеева салалтатынан волонтердар этэрээттэрэ үһүс сылын бэркэ үлэлээтэ, бэйэтин хайысхатын булла. Хамсык ыарыытын кэмигэр элбэх киһиэхэ көмөлөстүлэр. Маны сэргэ, устудьуоннар сэбиэт тэринэн, араас тэрээһиннэри иилээн-саҕалаан ыыталлар.

Быйылгыттан тутар этэрээт күүскэ үлэлиэҕэ. 2019 сылтан техникум  “Эркээйи эргиирэ” бырагыраама пилотнай балаһаакката буолбута.  Онон ыччаты төрүт култуураҕа сыһыарар, Ийэ дойдуга тапталы иҥэрэр этнопедагогика хайысхатынан үгүс үлэ барда. Ол курдук, элбэхтэн аҕыйаҕы кэпсээтэххэ, музейнай уруоктары, көрсүһүүлэри, кэпсэтиилэри тиһигин быспакка ыытабыт, спортивнай секцияларга өбүгэ оонньууларын киллэрдибит. Маны сэргэ, Намнааҕы Олоҥхо дьиэтин кытта ыкса ситим олохтонно. Соторутааҕыта оҕолор тимир уонна мас уустарын маастар-кылаастарыгар сылдьан, элбэҕи билэн-көрөн кэллилэр.

Кыайыы көтөллөөх, ситиһии аргыстаах!

Техникум урут-уруккуттан Нам улууһун суон сураҕырдар. Үөрэх кыһата выпуксниктарынан киэн туттар. Владимир Сивцев – өрөспүүбүлүкэҕэ уонна Уһук Илиҥҥэ ыытыллыбыт сварщиктар профессиональнай күрэхтэрин хас да төгүллээх кыайыылааҕа. Ини-бии Алексей, Сергей Козленколар – эмиэ үгүс күрэх кыайыылаахтара. Былырыын техникум преподавателэ Алексей Федоров маастардар икки ардыларыгар ыытыллыбыт сварщиктар күрэхтэригэр бастакы миэстэни ылбыта. Маны сэргэ, устудьуоннар “WorldSkills Russia” эдэр профессионаллар чемпионаттарыгар сыл аайы ситиһиилээхтик кытталлар.

Соторутааҕыта “Студент года” Бүтүн Арассыыйатааҕы күрэх региональнай түһүмэҕигэр техникуму кыһыл дипломунан бүтэрээри сылдьар Тимур Николаев “Интеллект года” номинацияҕа кыайда. Волонтердар этэрээттэрэ “Добровольческое объединение” диэн хайысхаҕа иккис миэстэ буолла. СӨ Ил Дархана сыл аайы бастыҥ устудьуоннарга туттарар истипиэндьийэтин былырыын үс оҕо ылбыта. Норуоттар икки ардыларынааҕы конференцияҕа М.С. Васильева “Эркээйи эргиирэ” бырагыраама техникумҥа хайдах үлэлиирин кэпсээн, иккис миэстэ буолла. Ол дакылаатынан өрөспүүбүлүкэтээҕи конференцияҕа иккис миэстэни ылары ситистэ. Итинник техникум устудьуоннара, преподавателлэрэ өрүү инники күөҥҥэ сылдьаллар, үөрэх кыһатын аатын ааттаталлар.

Абитуриент, болҕой!

Быйыл приемнай хамыыһыйа от ыйын 4 күнүттэн үлэлиир. Ол курдук, техникум 5 бөлөҕү сүүмэрдиир: үс – 9 кылаас кэнниттэн, икки – 11 кылаас кэнниттэн. 120 миэстэ көрүлүннэ.

9 кылаас кэнниттэн:  “Мастер по ремонту и обслуживанию автомобилей” – 2 сыл уонна 10 ый; “Повар, кондитер” – 3 сыл уонна 10 ый; “Сварочное производство” – 3 сыл уонна 10 ый.

11 кылаас кэнниттэн: “Мастер общестроительных работ” – 10 ый.

“Сварщик ручной и частично механизированной сварки (наплавки)” – 10 ый.

Ирдэнэр докумуоннар: сайабылыанньа, пааспар куоппуйата, үөрэх туһунан докумуон, 3*4 кээмэйдээх 4 уст. хаартыска.

Докумуоннары хайдах туталлар? Манна хас да ньыматтан биири талыаххытын сөп:

- Техникум приемнай хамыыһыйатыгар тиийэн. Аадырыһа: Нам улууһа, Граф Биэрэгэ, Советскай уул., 20.  

- edu.e-yakutia.ru үөрэхтээһин биир кэлим порталын нөҥүө;

- priem_nt@mail.ru электроннай почтаҕа ыытан;

- «Арассыыйа почтатын» өҥөтүнэн туһанан. Техникум аадырыһа: Нам улууһа, Граф Биэрэгэ, Советскай уул., 20.   Индексэ: 678386.

 

Билсэр төл. 89243690242.

Сайт: https://nam-nt.obr.sakha.gov.ru/

Телеграмм: https://t.me/namteh

Реклама

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Мария Мигалкина:   «Кэлии сиэмэлэринэн үлүһүйүмэҥ»
Дьон | 19.07.2024 | 10:00
Мария Мигалкина: «Кэлии сиэмэлэринэн үлүһүйүмэҥ»
Мин бүгүн ааҕааччыларбар, ордук хаһаайкаларга, 35 сыл үлэлээбит уопуттаах агроном, билигин биэнсийэлээх, дойдутугар сайылыы сылдьар Мария Семеновна Мигалкинаны кытта тэлгэһэтигэр тиийэн, үүнээйитин, сибэккитин көрө-көрө, дуоһуйа, астына кэпсэттим.   Сибэккигэ уоҕурдууну хото туттабын Бастатан туран ааҕааччыларга циния диэн сибэкки туһунан кэпсиэҕим. Урут биһиги “Циния обыкновенная” диэни олордор этибит, билигин “Циния кустовая” диэн...
Дьулустаан Ноговицын: ДЬУЛУС! ТУЛУС! КЫАЙ!
Дьон | 11.07.2024 | 10:00
Дьулустаан Ноговицын: ДЬУЛУС! ТУЛУС! КЫАЙ!
«Киин куорат» хаһыат бүгүҥҥү ыалдьыта – Туймаада туонатын Үрүҥ Тунах ыһыаҕын «Дыгын оонньуулара» күөн-күрэһин Таас Боотура, быйылгы күрэх муҥутуур кыайыылааҕа Дьулустаан Ноговицын.   Дьулустаан Ноговицын: – Дьокуускай куорат 1№-дээх баһаарынай чааһын байыаһа, төрөппүттэригэр соҕотох уол, эдьиийигэр быраат, тапталлаах кэргэн, үс оҕо амарах аҕата; – Мас тардыһыытыгар Саха Өрөспүүбүлүкэтин, Арассыыйа уонна аан...
Изабелла Попова: Сүрэхпэр сөҥөрбүт дьүөгэлэрим
Дьон | 19.07.2024 | 12:00
Изабелла Попова: Сүрэхпэр сөҥөрбүт дьүөгэлэрим
Арассыыйа үөрэҕириитин туйгуна, Саха сирин үөрэҕириитин бочуоттаах үлэһитэ, хас да кинигэ ааптара Изабелла Ильинична Попова бүгүн өрөгөйдөөх үбүлүөйүн көрсө өссө биир кинигэтин сүрэхтиир. Дьэ, кырдьык, сүрэхтиир... Сүрэҕин сылааһын иҥэрбит кинигэтин!   Ахтар-саныыр дьүөгэлэрим, Аламаҕай сэгэрдэрим, Саһарҕалаах сарсыардабын Сандаарытар куоларым!   Сүр... Сүрэх, сүрдээх, сүрэхтиир... Сахабыт тыла барахсан тугун бэрдэй! Биир тылтан силистэнэн-мутуктанан...