Үөрэбит дуу...

Арыгыны утары охсуһуу тиэмэтин салгыы сырдаттахха, ааспыт нэдиэлэ түмүгүнэн Дьокуускайга итирик туруктаах суоппар ахсаана аҕыйаабыта бэлиэтэннэ. Ол курдук, бу иннинээҕи нэдиэлэҕэ киин куоракка 57 суол быһылаана буолбут, онтон 9-һа – киһи эчэйиилээх. 956 суол быраабылатын кэһии бэлиэтэммит, ол иһигэр 14 итирик туруктаах суоппар тутуллубут. Ити биллэ намыһах көрдөрүү – 36 суоппар (ол иннинээҕи нэдиэлэҕэ), 38 – сэтинньи бүтэһик нэдиэлэтигэр.
Аны туран, өрөспүүбүлүкэ үрдүнэн итирик туруктаах буруйуу оҥоруу 19% аҕыйаабыт. Саха Өрөспүүбүлүкэтин прокуратурата иһитиннэрбитинэн, 2023 сыл 10 ыйыгар аһыы утаҕы иһии түмүгэр 2386 буруйу оҥоруу түбэлтэтэ тахсыбыт. Тэҥниир буоллахха, былырыыҥҥы көрдөрүү оруобуна бу кэмҥэ 2950 эбит. Үчүгэйэ диэн, уопсастыбаннай сиргэ буруйу оҥоруу аҕыйаабыт. Ол оннугар ыар буруйу оҥоруу, түөкүннээһин элбээбит.