Өрөспүүбүлүкэ күнүн хайдах бэлиэтээтибит?

Аан бастакытын Саха сиригэр өрөспүүбүлүкэ күнэ онлайн эрэсииминэн ыытылынна.

Бырааһынньыктааҕы күҥҥэ араадьыйа нөҥүө ырыа-тойук Ленин болуоссатыгар тыаһаата. Социальнай ситимнэргэ хоһоон ааҕыыта, төрөөбүт дойду туһунан ырыалары толоруу, ону тэҥэ дьон-сэргэ сахалыы таҥастаах “Всем сердцем Якутия, я с тобой!” диэн хэштэгтээх өрөспүүбүлүкэ былааҕын бэйэ-бэйэлэригэр виртуально бэристилэр.

Онтон куорат уокуруктарыгар, кытыы бөһүөлэктэргэ онлайн флешмобтар, хоһоон ааҕааччыларга, хаартыскаҕа түһэрээччилэргэ  анаан күрэхтэһиилэр, быыстапка, аахсыйа, викторина арааһа ыытылынна.

***

Ил Дархан Айсен Николаев бэлиэ күҥҥэ өрөспүүбүлүкэ олохтоохторун  эҕэрдэлээтэ. “Бүгүн биһиги киэн туттар улуу убайдарбыт Былатыан Ойуунускай, Максим Аммосов, Исидор Барахов, Степан Аржаков уо.д.а. судаарыстыбаннай  уонна уопсастыбаннай деятеллэрбит, кинилэр хорсун, патриотическай быһыылара, политическай хардыылара өрөспүүбүлүкэ  төрүттэниитигэр, сайдыытыгар олук уурбута.  Өрөспүүбүлүкэбит өссө бөҕө тирэхтээх буоларыгар  туруоруммут сыалбытын ситиһэрбитигэр эрэнэбин. Биһиги элбэх ахсааннаах норуоппут, кинилэр күннээҕи кыһамньылара, күүстээх санаалара, мындыр өйдөрө, үлэҕэ сыһыаннара аныгы сайдыылаах Саха сирэ төрүттэниитигэр сүдү суолталааҕын сыаналаах тустаахпыт”, - диэн Ил Дархан эҕэрдэлээтэ.

***

Өрөспүүбүлүкэ күнүн көрсө Ил Дархан ыйааҕынан “Хотугу сулус” уордьаны Аҕа дойду сэриитин кыттыылааҕа, уопсастыбаннай деятель Петр Конкин тутта. Кини литература салаатыгар бэрт элбэх үлэни ыытта, култуурунай уонна историческай нэһилиэстибэни үйэтитиигэ, үүнэр көлүөнэни патриотизмҥа иитэр-такайар өр сыллаах кыһамньылаах үлэтин иһин судаарыстыба үрдүкү бэлиэтин ылла.

***

Өрөспүүбүлүкэ бочуоттаах олохтооҕо аатын Аҕа дойду Улуу сэриитин кыттыылааҕа Петр Яковлев сүктэ. Кини бэтэрээннэр хамсааһыннарын актыбыыһа, ону сэргэ Петр Константинович  киин куорат Промышленнай уокуругун бэтэрээннэрин Сэбиэттэрин биир тутаах кыттыылааҕа.

***

Нам улууһун киинигэр Култуура уонна Духуобунай сайдыы киинин бастакы сыбаайатын үөрүүлээх быһыыга-майгыга түһэрдилэр. Тутуу Нам улууһуттан төрүттээх, Саха сирэ бүттүүнэ киэн туттар уола Максим Аммосов төрөөбүтэ 125 сылыгар ананан ыытыллар диэн Ил Дархан Айсен Николаев эттэ.

Ааспыт үйэҕэ 1956 сыллаахха тутуллубут Норуот айымньытын дьиэтигэр, 1982 сылтан бастакы өрөмүөннэр саҕаланан барбыттара. Онтон 2016 сыллаахха букатыннаахтык хаарбах туруктаах диэн билиниллибитэ.

Эбийиэк 5600 квадратнай иэннээх, үс мэндиэмэннээх, 400 киһи олорор саалалаах буолуоҕа. Култуура дьиэтэ 2020 сыл үһүс кыбаарталыгар олоххо киириэхтээх.