Поликлиникалар ковиднай стационардара үлэлэрин тохтоттулар

Киин куоракка бүгүҥҥүттэн, кулун тутар 10 күнүттэн,  поликлиника иһинэн үлэлиир ковиднай стационардар үлэлэрин тохтоттулар. Ити быһаарыы эпидемиологическай быһыы-майгы тупсубутун кытта сибээстээх. Бу туһунан уочаратттаах брифиҥҥэ регионнааҕы Суһал штаб салайааччытын солбуйааччы Ольга Балабкина иһитиннэрдэ.
 «Ковидынан ыалдьыбыт дьону эмтииргэ аналлаах балыыһаларга куойкалар хаалыахтара. Ити – Дьокуускайлааҕы өрөспүүбүлүкэ клиническай, Өрөспүүбүлүкэ 2-с уонна 3-с №-дээх балыыһалара, итиннэ билигин аҕа саастаах гражданнарга анал көмөнү оҥороллор», - диэтэ Ольга Балабкина.
Бу нэдиэлэ бүтүөр диэри реабилитационнай кииннэр үлэлэрин боппуруоһа быһаарыллыахтаах. Ольга Балабкина бэлиэтээбитинэн, бүгүҥҥү күҥҥэ сүрүн сыалынан ковидынан ыалдьан баран үтүөрбүт дьону чөлүгэр түһэрии буолар. 
Суһал штаб салайааччытын солбуйааччы информациятынан, өрөспүүбүлүкэ улуустарыттан Мэҥэ Хаҥаласка уонна Аммаҕа саамай элбэх киһи балыыһаламмыт. Кинилэргэ сыһыаннаан Саха сирин доруобуйа харыстабылыгар Министиэристибэтэ методическай миэрэлэри ылыаҕа.