От ыйын 1 күнэ – Бүтүн Арассыыйатааҕы куоластааһын күнэ

Киин быыбардыыр хамыыһыйа куоластааһыҥҥа алта көрүҥү киллэрэр. Ол иһигэр электроннай уонна алтыһыыта суох ньыма кытта баар. Онон атын сиргэ барбыт, харантыыҥҥа олорор, ыалдьан дьиэттэн тахсыбат да буоллаххытына куоластыыр гражданскай иэскитин толорор кыахтааххыт.

Хайдах кыттыахха сөбүй?

Куоластааһыҥҥа дьиэттэн олорон кыттыахха сөп: сайабылыанньаны  судаарыстыбаннай өҥөлөр порталларыгар, элбэх функцияны толорор кииҥҥэ (МФЦ), территориятааҕы уонна учаастактааҕы быыбардыыр хамыыһыйаларга (ТИК уонна УИК) биэриэххэ сөп.

УИК-тарга сайаапкалары бэс ыйын 16 күнүттэн ылан барбыттара, атын үөһэ ааттаммыт көрүҥнэри бэс ыйын 5 күнүттэн туппуттара.

Сайаапкалары бэс ыйын 21 күнүгэр күнүс 14:00 чааска — судаарыстыбаннай өҥөлөр порталларыгар Москва бириэмэтинэн, атын пууннарга — олохтоох бириэмэнэн ылан бүттүлэр.

Куоластыыргар бэйэҕэр сөптөөх учаастагы «ТИК и УИК на карте России» сервиһинэн талыаххын сөп.

Өскөтүн киһи пропискалаах сиригэр куоластаабатын сайабылыанньанан биллэрдэҕинэ, тута испииһэктэн уһуллар. Ол эрээри куоластааһын күнүгэр диэри бэйэтин быһаарыытын уларытыан уонна пропискалаах сиригэр кэлэн куоластыан сөп. Маннык түбэлтэҕэ хамыыһыйа «Выборы» ГАС нөҥүө бу киһи өссө ханна да куоластыы илигин чуолкайдаһан баран биирдэ бүллүтүөнү биэрэр.

Сөптөөх усулуобуйа тэриллиэҕэ

Судаарыстыба баһылыга Владимир Путин от ыйын 1 күнүн РФ Төрүт сокуонугар көннөрүүлэри киллэриигэ куоластааһын күнүнэн биллэрбитэ. Аан дойдуну атыйахтыы аймаабыт дьаҥы утары үлэ бара турарынан сибээстээн, куоластааһын күнүгэр дьоҥҥо анаан туох баар сөптөөх усулуобуйа тэриллэр: санааларын этэллэригэр уонна куоластыыр учаастактарга кинилэр доруобуйаларыгар ханнык да куттал суоһаабатыгар маасканан, бэрчээккинэн, дезинфекциялыыр ньымаларынан, биирдэ туттуллар уруучуканан хааччыйыахтара.

Быыбардыыр учаастак үлэһиттэрин, кэтээн көрөөччүлэри, суруналыыстары маасканан, бэрчээккинэн, халаатынан хааччыйыахтара. Ону таһынан термометрдэри, сирэйи көмүскүүр экраннары түҥэтиэхтэрэ. Оройуон кииннэригэр, куораттарга харыстанар ньымалары тарҕатыахтара.

Элбэх ханааллаах босхо төлөпүөн үлэлиир: 8-800-200-00-20. Ким баҕалаах бу нүөмэринэн эрийэн интэриэһиргиир ыйытыытын биэриэн сөп.

799 быыбардыыр учаастак баар

Биһиги өрөспүүбүлүкэбитигэр799 быыбардыыр учаастак баар.Онтон 791 бастайааннай, 8  кылгас болдьоххо: үс учаастак полярнай ыстаансыйаларга, үс хайаны байытар бөдөҥ тэрилтэлэргэ, икки улахан медицина киинигэр Дьокуускай куоракка.

Саха сирин кытыы нэһилиэнньэлээх пууннарын 8000-тан тахса кэриҥэ олохтооҕо Төрүт сокуоҥҥа уларытыылары киллэриигэ эрдэ куоластыахтара. Быыбардыыр хамыыһыйалар үлэһиттэрэ кинилэргэ бөртөлүөтүнэн, вездеходтарынан уонна уу мотуордарынан тиийиэхтэрэ.

Эрдэ куоластааһын 20 хонук иннинэ саҕаланна.500 ыраах, суола-ииһэ суох нэһилиэнньэлээх пуун хабыллыахтаах. Онно 8 тыһыынчаттан тахса киһи олорор — табаһыттар, сылгыһыттар, балыксыттар, метеорологтар, сир баайын туһаҕа таһаарааччы тэрилтэлэр үлэһиттэрэ.

Өскөтүн Дьокуускайга прописката суох буоллаххытына:

Бэс ыйын 25 күнүттэн от ыйын 1 күнүгэр диэри Орджоникидзе уул., 26, “Кыайыы 50 сыла” спорткомплекс дьиэтигэр баар 136 нүөмэрдээх быыбардыыр учаастакка тиийэҕит.

Бэс ыйын 16-24 күннэригэр: 10:00 – 14:00 ч.

Бэс ыйын 25 күнүттэн от ыйын 1 күнүгэр диэри: 10:00 – 18:00 ч.

Куоракка пропискалааххыт, ол эрэн атын сиргэ олороҕут, олорор сиргитинэн куоластыаххытын баҕараҕыт эбэтэр быстах болдьоххо оҥоһуллубут пропискалааххыт:

Бэс ыйын 21 күнүгэр диэри атын чугастааҕы учаастаккытыгар сайаапка түһэрэн сыһыарыллыбыт буолуохтааххыт.

Нэдиэлэ устата куоластыахха сөп

Куоласкытын нэдиэлэ устата, бэс ыйын 25 күнүттэн саҕалаан, куоластыыр учаастактарга табыгастаах бириэмэҕитигэр биэриэххитин сөп.

• Гражданнар куоластыылларыгар кинилэргэ ордук табыгастаах кэми хааччыйыы.
• Дьон элбэх буолан тоҕуоруһуутун таһаарбат туһугар үлэ барыаҕа.

Сэрэхтээх буолуу ньымалара: 

- Ыкса алтыһыы суох буолуоҕа.

- Учаастакка кэлбит дьон температуратын мээрэйдиэхтэрэ.

- Мааска, бэрчээкки, биирдэ туттуллар уруучука түҥэтиллиэҕэ.

- Быыбарга кэтээн көрөөччүлэр, үлэһиттэр, суруналыыстар бары харыстанар ньымалары толору туһаныахтара.

- Быыбардыыр хамыыһыйа чилиэннэрэ коронавируска анаалыс туттарыахтара.

- Куоластыаххыт иннинэ хамыыһыйа үлэһитэ мааскаҕын уһулан сирэйгин көрдөрөргөр көрдөһүөн сөп.

- Куоластааччы пааспарын тэйиччи туран эрэ бэйэтэ арыйан көрдөрөр.

- Куоластааһыҥҥа 15 мүнүүтэттэн ордук бэриллибэт.

- Куоластыыр кабинкалар бэйэ-бэйэлэриттэн ыраах-ыраах туруохтара. Бүллүтүөн угар дьааһыктары дезинфекциялаан баран арыйыахтара.

- Куоластааччы ахсаана 1 чааска 8-12 элбэх буолуо суохтаах.

- Быыбардыыр учаастактарга аһыыр, утах иһэр көҥүллэммэт.

- Куоластааһын учаастактарын оскуолаларга, дьиэлэр, үөрэх кыһаларын тиэргэннэригэр арыйыахтара.

Дьиэттэн тахсыбакка эрэ хайдах куоластыыбыт?

Өскөтүн регистрацияламмыт сиргититтэн атын сиргэ олорор буоллаххытына, ханнык баҕарар атын учаастакка куоластыаххытын сөп.

Дьиэҕэ кэлбит быыбардыыр хамыыһыйа үлэһиттэрэ дьиэҕэ киирбэккэ туран куоластатыахтара. 

Куоластыырга бэлэмҥит туһунан сайаапката биэриҥ:

• Ханнык баҕарар МФЦ офиһыгар (бэс ыйын 5-21 күннэригэр).
• Ханнык баҕарар быыбардыыр учаастакка (бэс ыйын 5-21 күннэригэр).
• Судаарыстыбаннай өҥөлөр порталларыгар (бэс ыйын 5-21 күннэригэр).
• Ханнык баҕарар территориялаах хамыыһыйаҕа (бэс ыйын 5-21 күннэригэр).

Эрдэ куоластыахха сөп дуо?

Испииһэккэ киирбит учаастаккытыгар  бэс ыйын 25-30 күннэригэр.

Дьиэҕэ хайдах куоластыыбыт?

Дьиэттэн олорон куоластааһыҥҥа бэс ыйын 25-30 күннэригэр эбэтэр от ыйын 1 күнүгэр кыттыаххытын сөп.

Бэс ыйын 16 күнүттэн от ыйын 1 күнүн 16.00 ч. диэри бэйэҕит быыбардыыр учаастаккытыгар биллэриҥ. Аймахтаргытынан эбэтэр волонтердарынан илдьиттиэххитин сөп.

Хаһан табыгастааҕын быһаарсаҕыт.

Эбэтэр “Госуслуги” нөҥүө сайаапка биэриэххэ сөп.