Оскуолаларга – экология уруоктара

Саҥа үөрэх дьыла саҕаланыаҕыттан киин куорат оскуолаларыгар «Өлүөнэ очуостара» национальнай паарка үлэһиттэрэ экология уруоктарын ыыталлар. Бу туһунан паарка пресс-сулууспата иһитиннэрдэ.

Экология бастакы уруогун «Өлүөнэ очуостара» национальнай паарка «Глобальнай үөрэхтээһин киинэ» гимназия үһүс кылааһын үөрэнээччилэригэр ыытта. Туруйа аан дойдутааҕы күнүгэр анаммыт уруокка  экологияны сырдатыыга кылаабынай исписэлиис Олеся Кондакова-Захарова бу күн төрүттэммит историятын, туруйа араас көрүҥнэрин туһунан сиһилии кэпсээтэ.

Уруок бүтэһигэр оҕолор туруйа оригамитын оҥордулар, итиэннэ викторинаҕа кытыннылар. Саамай көхтөөх үөрэнээччилэр национальнай паарка аатыттан өйдөбүнньүк бириистэри туттулар.

Манна даҕатан эттэххэ, аан дойду үрдүнэн Туруйа күнүн балаҕын ыйын иккис өрөбүлүгэр бэлиэтииллэр, быйыл ити күн балаҕан ыйын 10 күнүгэр түбэһэр.

Аан дойдуга туруйа 15 көрүҥэ баара биллэр, олортон Арассыыйаҕа сэттэ көрүҥэ уйаланар. Туруйа сэдэх көрүҥэ Кыһыл кинигэҕэ киирбитэ.