Оскуола инфраструктуратын тупсарыынан уон бырайыак кытынна

Ахсынньы 2 күнүгэр, СӨ көҕүлээһиннээх бүддьүөттээһинин I-гы бэстибээлигэр, Дьокуускай куорат уонна Жатай бөһүөлэгин уон оскуолаларын хамаандалара, оскуола инфраструктуратын тупсарыытыгар туһуламмыт үбүлээһин бырайыактарын билиһиннэрдилэр.

«Үөрэнээччилэр бырайыактара бары сыл бүтүөр диэри үлэҕэ киириэхтэрэ. Пилотнай оскуолалартан барыта  41 бырайыак киирдэ, итинтэн оскуолалар түмүк мунньахтарынан сүүмэрдээһини 18 бырайыак ааста. Оскуолалар мунньахтарыгар куоластааһыҥҥа 5305 үөрэнээччи уонна педагог кытынна», – диэн иһитиннэрдэ СӨ үпкэ миниистирэ Валерий Жондоров.

Тэрээһиҥҥэ Хаҥалас улууһун Өктөм сэлиэнньэтин орто оскуолатын – «ЭкоШкИБ» экологическэй хайысхалаах оскуола көҕүлээһиннээх бүддьүөттээһинин бырайыагын федеральнай куонкуруһун кыайыылааҕын чиэстээтилэр. Кинилэр «Бастыҥ сырдатар бырайыак» номинацияҕа, «Экологическэй патруль» диэн зооволонтерствоҕа сыһыаннаах бырайыагынан кытыннылар. Бырайыагын олоххо киллэрэргэ хамаанда 150 тыһыынча солкуобай кээмэйдээх бирииһи ылар буолла.

Бэлиэтэммитинэн, Арассыыйа Үпкэ министиэристибэтин научнай-чинчийэр институтун экспертэрэ өрөспүүбүлүкэ пилотнай оскуолаларын үөрэнээччилэригэр үөрэтэр тэрээһиннэри ыыттылар, онно 100-тэн тахса  үөрэнээччи уонна педагог кытынна.