Оҥхойго ураты эҕэрдэ

Үөһээ Бүлүү улууһун Оҥхой нэһилиэгэр үрүҥ илгэни үрүлүтэр үтүө күннэр үүммүттэринэн, окко киирии үөрүүлээх кэминэн олохтоох дьаһалта үлэһиттэрэ, нэһилиэк дьокутааттара бар дьону уратытык эҕэрдэлээтилэр.

Тэрээһин Улуу Кыайыы 75 сыллаах, Үөһээ Бүлүү оройуона тэриллибитэ 85 сыллаах өрөгөйдөөх үбүлүөйдэрин чэрчитинэн ыытылынна. Күөх быйаҥтан үгүөрүтүк сомсоҥҥут, уйгу-быйаҥ, уһун дьоллоох олохтонуҥ диэн туран олохтоох дьаһалта үлэһиттэрэ, нэһилиэк дьокутааттара быырпаҕынан күндүлээтилэр, үтэhэлээх сылгы этин түөлбэлэринэн түҥэттилэр.

Оҥхой нэһилиэгин тумус туттар, сүбэ-соргу биэрэр, маанылаах далбар хотуна, иһирэх ийэ, элбэх сиэн, хос сиэн эйэҕэс эбэтэ Александра Кирилловна Дмитриева оччугуй оҕо сааһыттан үлэни өрө тутан кэлбитэ, уоттаах сэрии сут кураан сылларыгар хотуулаахтык үлэлээбитэ. Улуу Кыайыыны уһансыбыт үлэ, тыыл бэтэрээнэ, ытык мааны киһилэрин 90 сааһын туолар үбүлүөйдээх күнүнэн эҕэрдэлээтилэр. Нэhилиэк дьокутааттара биир санаанан Александра Кирилловнаҕа “Нэһилиэк бочуоттаах олохтооҕо” үрдүк ааты иҥэрдилэр, СӨ Ил Дархана А.С. Николаев, дойдубут бэрэсидьиэнэ В.В. Путин эҕэрдэ суруктарын үөрүүлээх быһыыга-майгыга туттардылар.

“Оҥхой нэһилиэгэ” МТ дьаһалтата