Норуот худуоһунньугун кытта – искусство абылаҥар

Быыстапкаҕа устуудьуйаҕа хаһыс да сылларын ситиһиилээхтик дьарыктанар Октябрина Спиридонова, Наталья Силина, Жанна Васильева, Ксения Эверест о.д.а. үлэлэрэ, ону сэргэ салайааччы, Арассыыйа үтүөлээх худуоһунньуга, Саха Өрөспүүбүлүкэтин норуодунай худуоһунньуга Юрий Спиридонов бэйэтин хартыыналара тураллар.

Быыстапканы үөрүүлээхтик арыйыы Хатас нэһилиэгин киэн туттуута, өр сылларга «Хатас» сопхуоһу салайбыт бөдөҥ судаарыстыбаннай деятель Прасковья Павловна Федорова бюһуттан саҕаланна. Норуодунай худуоһунньук ыалдьыттааһына курдук нэһилиэк историятыгар биир дьоһун суолталаах тэрээһиҥҥэ Хатастааҕы «Тускул» Култуура киинин салайааччыта Валентин Чепалов, Хатас историятын музейын салайааччыта Петр Баишев,  «Үргэл» Арт-галерея үлэһиттэрэ, устуудьуйа уһуйуллааччылара,  нэһилиэк олохтоохторо кыттыыны ыллылар.
Тэрээһини «Тускул» Култуура киинин айар холбоһуктары кытта үлэҕэ исписэлииһэ Наталья Руфова иилээн-саҕалаан ыытта.
Быыстапканы көрө кэлбит дьон РФ үтүөлээх худуоһунньуга, СӨ норуодунай худуоһунньуга Юрий Спиридоновтан бэйэтиттэн живописька маастар-кылаас ылар дьолго тигистилэр. Үс чаас устата «Өлүөнэ очуостара» диэн тиэмэҕэ уруһуйдаан, норуодунай худуоһунньуктан сүбэ-ама ылан, төгүрүк остуол тула олорон иһирэхтик сэһэргэһэн, умнуллубат көрсүһүү буолла. 

«Култуура эйгэтэ» федеральнай бырайыак чэрчитинэн арыллыбыт «Искусство абылаҥа» быыстапка бүгүҥҥүттэн, кулун тутар 31 күнүттэн, муус устар 7 күнүгэр диэри Хатас нэһилиэгин историятын музейыгар үлэлиир: Хатас нэһ., Совхознай уул., 43.