«Норуот бүддьүөтэ» 2025 сылга олоххо киллэриллэр бырайыактарга сайаапкалары күүтэр

Дьокуускай куорат Олохтоох дьаһалтата куорат бүддьүөтүттэн субсидия ылар кыаҕы биэрэр «Норуот бүддьүөт» социальнай бырайыактар куонкурустарыгар нэһилиэнньэттэн сайаапкалары сэтинньи 11 күнүттэн ылан саҕалыыр.
Физическэй уонна юридическэй сирэйдэртэн, уопсастыбаннай тэрилтэлэртэн уонна түмсүүлэртэн киирэр бырайыактары сүүмэрдээһин Олохтоох дьаһалта 2020 сыл балаҕан ыйын 1 күнүнээҕи 248п №-дээх «Дьокуускай куорат» куораттааҕы уокурукка «Норуот бүддьүөтэ» бырайыак балаһыанньатын бигэргэтии туһунан» уураахха сэтинньи ый 7 күнүнээҕи 333п №-дээх уларытыылар туһунан уураахха олоҕуран ыытыллар. 
Куонкурус усулуобуйатын быһыытынан, көҕүлээччилэр бырайыагы олоххо киллэрии сыанатын 20 % уйуналлар, ордубут суумата олохтоох бүддьүөттэн үбүлэнэр. Бырайыактар түөрт хайысханан ылыллаллар:
1. Уопсастыбаннай эбийиэктэри тутуу, уларытан тутуу, өрөмүөн;
2. Уопсастыбаннай туоналары тупсарыы;
3. Аһымал, социальнай, волонтерскай аахсыйалар;
4. Култуура, үөрэх, спорт тэрээһиннэрэ.
Сайаапкалары 2024 сыл сэтинньи 11 күнүттэн олохтоох бириэмэнэн сарсыарда 09:00 чаастан туталлар.
Сайаапкалары тутан бүтүү болдьоҕо: 2024 сыл ахсынньы 10 күнэ, олохтоох бириэмэнэн киэһэ 18:00 чааска диэри.
Сайаапка биэрээччилэр докумуоннарын суругунан Олохтоох дьаһалта дьиэтигэр аҕалан туттараллар: 677007, Саха Өрөспүүбүлүкэтэ, Дьокуускай к., Ленин пр., 15, 712 каб., Территориялары кытта үлэҕэ департамент (төл.: 40-88-48). 
Сайаапкалары тутар бириэмэ: бэнидиэнньиктэн бээтинсэҕэ диэри сарсыарда 09:00 чаастан киэһэ 18-00 чааска диэри, эбиэккэ тохтобул: 13:00 -14:00 чч.
Сайаапкалары уокуруктар дьаһалталарыгар эмиэ туттарыахха сөп. Куонкурус балаһыанньатын кытта сиһилии билсэр ссылка: https://yakutskcity.ru/press-tsentr/na-territorii-goroda-yakutska-obyavlen-mesyachnik-bezopasnosti-na-vodnykh-obektakh-bezopasnyy-lyed/