Дьокуускайга уонна улуустар кииннэригэр 39 Ийэ оскуолата үлэлиир

Дьокуускай куоракка уонна өрөспүүбүлкэ улуустарын кииннэригэр арыллыбыт Ийэ оскуолаларыгар хат дьахталларга оҕо күүтэр кэмнэригэр араас хабааннаах көмөнү оҥороллор.  
Биир оннук оскуола Таатта улууһун киин балыыһатыгар үлэлиир. Ийэ буоларга бэлэмнэнэр дьахталларга уопуттаах акушердар уонна гинекологтар консультациялары биэрэллэр. «Бырагыраама быһыытынан, сөпкө аһааһынтан саҕалаан, массааска уонна эмтэриигэ тиийэ үөрэтэбит», - диэн иһитиннэрэр уопуттаах акушер, доруобуйа харыстабылын туйгуна Антонина Павлова. Оройуоҥҥа бүгүҥҥү күҥҥэ учуокка 72 хат дьахтар турарыттан, үгүстэрэ бу дьарыктарга көхтөөхтүк сылдьаллар. Кинилэри кытта медико-психолого-социальнай көмө кабинета эмиэ үлэлэһэр. 

Бэлиэтээн эттэххэ, сыл аҕыс ыйын түмүгүнэн Саха сирэ Уһук Илин регионугар оҕо төрөөһүнүгэр инники кэккэҕэ сылдьар. Онуоха ийэ буолууну уонна оҕо сааһы өйүүр харчынан көмө кээмэйэ кэлиҥҥи алта сылга 8 төгүл улаатан, 29,5 млрд солк. тэҥнэспитэ эмиэ төһүү буолара саарбаҕа суох. Ол курдук, Саха Өрөспүүбүлүкэтигэр маннык 50-ча араас социальнай өйөбүл көрүҥэ үлэлиир, диэн иһитиннэрэр Ил Дархан уонна Бырабыыталыстыба пресс-сулууспата.