Летнай училищеҕа саҥа үөрэнэр корпус тутуллуоҕа
Авиация маршала А.А. Новиков аатынан Санкт-Петербурдааҕы судаарыстыбаннай гражданскай авиация университетын Дьокуускай куораттааҕы филиалын баазатыгар кампус тутуллар буолбут.
СӨ тырааныспар министиэристибэтин көҕүлээһининэн ыытыллыбыт маныаха аналлаах көһө сылдьар мунньахха туһааннаах министиэристибэлэри сэргэ Дьокуускай куорат Олохтоох дьаһалтатын бэрэстэбиитэллэрэ кыттыыны ыллылар.
Санатар буоллахха. Дьокуускайдааҕы летнай училище 1974 сыллааҕы, үөрэх процеһын ыытарга анала суох – спорт саалата суох, аныгы ирдэбилгэ сөп түбэспэт остолобуойдаах, Арассыыйа атын регионнарыттан уонна өрөспүүбүлүкэ улуустарыттан кэлээччилэри барыларын батарар кыаҕа суох уопсайдаах – дьиэҕэ үлэлии олорор.
«Санкт-Петербурдааҕы судаарыстыбаннай гражданскай авиация университета» ФГБОУ сайдыытын стратегиятын быһыытынан Дьокуускай куораттааҕы филиалга 450-650 миэстэлээх аныгылыы үөрэнэр корпус тутуллар буолбут. Остолобуойдаах, спорт саалалаах, аныгы авиатренажердарынан хааччыллыылаах, уопсай дьиэлээх үөрэх корпуһун тутарга 4 га иэннээх сир учаастага 2022 сыллаахха аэропорт таһыгар, билиҥҥи училище аттыгар быһаарыллыбыта. Тутуу ыытыллыахтаах территориятыгар хабыллар 5 элбэх кыбартыыралаах дьиэ 2025 сылга көтүрүллэргэ быһаарыллыбыта.
Көтүрүллүбүт дьиэлэр олохтоохторун көһөрүү кэнниттэн учаастактар федеральнай бас билиигэ бэрилиннэхтэринэ, манна Уһук Хоту уонна Уһук Илин усулуобуйатыгар үлэлиир уопуттаах авиационнай испилиистэри бэлэмниир аныгылыы үөрэх кыһатын үөрэнэр корпуһун тутуу саҕаланыахтаах, диэн иһитиннэрэр тырааныспар министиэристибэтэ.
Сонуннар
Ордук ааҕаллар
