Куорат харыйатын туруоруу саҕаланна

Бүгүҥҥүттэн, сэтинньи 7 күнүттэн, киин куорат сүрүн болуоссатыгар - Орджоникидзе аатынан болуоссакка Саҥа дьыллааҕы харыйаны туруоруу саҕаланар.
Бу үлэҕэ эппиэттээх «Горсвет» муниципальнай тэрилтэҕэ иһитиннэрэллэринэн, 20 миэтэрэ үрдүктээх искусственнай харыйаны таҥан таһаарарга икки нэдиэлэ курдук ирдэнэр. 
Оттон ахсынньы 1 күнүгэр «Кыһын Саха сириттэн саҕаланар» үгэс буолбут бэстибээл чэрчитинэн харыйа уоттара уматыллыаҕа. 
Олохтоох дьаһалта пресс-сулууспата иһитиннэрэринэн, быйыл Орджоникидзе болуоссатыгар туруоруллар харыйа уруккутун курдук сахалыы тыыннаах буолар. Сүрүн киэргэллэринэн ыстанан эрэр таба, «биэс харах» харысхал бэлиэтэ буолуохтара. 
Симэммит харыйаны дьүөрэлии кытыйа быһыылаах кыһыҥҥы фонтан холбонуоҕа, диэн иһитиннэрэр пресс-сулууспа.