Роман Дмитриев аатынан кытыл арылынна!

Сэтинньи 4 күнүгэр Дьокуускай куоракка улуу олимпиец Роман Дмитриев аатын сүгэр кытылы арыйыы үөрүүлээх церемонията буолан ааста.
Роман Дмитриев аатынан кытылы үөрүүлээх быһыыга-майгыга арыйыыга СӨ Бырабыыталыстыбатын бэрэссэдээтэлэ Кирилл Бычков, куорат баһылыгын эбээһинэһин толорооччу Георгий Гаврильев, Роман Дмитриев огдообото Антонина Дмитриева, спортсменнар, уопсастыбаннас кыттыыны ыллылар. 
Бырабыыталыстыба бэрэссэдээтэлэ Кирилл Бычков бу түгэн Сомоҕолоһуу күнүн кытта ситимнээҕэ сүҥкэн суолталааҕын бэлиэтээтэ.
Куорат баһылыгын э.т. Георгий Гаврильев Роман Дмитриев аатынан кытыл Дьокуускай куорат маастар-былаанын иитинэн тутуллубутун бэлиэтээтэ. Дойду баһылыга Владимир Путин бигэргэппит маастар- былаанынан соторутааҕыта Дьокуускай куоракка Ленин болуоссата арыллыбытын, аны аҕыйах кэминэн Сайсары кытыла уонна Ийэ сквера тутуллан бүтэллэрин санатта уонна өрөспүүбүлүкэ салалтатыгар, киин куоракка маннык эбийиэктэр тутуллалларыгар кылааттаах дьоҥҥо барыларыгар куорат олохтоохторун аатыттан махталын биллэрдэ. 

Антонина Дмитриева куорат бу эҥэригэр баар кытылга Роман Дмитриев аатын биэрээри гынабын диэн этиини хара маҥнайгыттан сөбүлүү истибитин бэлиэтээтэ. «Роман Михайлович Өлүөн эбэни олус таптыыра. Өрүс үрдүгэр төрөөбүт, улааппыт киһи аата Өлүөнэ кытылыгар сытар уулуссаҕа бэриллибитэ олус үчүгэй», – диэтэ уонна СӨ Бырабыыталыстыбатыгар, Ил Түмэҥҥэ, Дьокуускай куорат Олохтоох дьаһалтатыгар, бырайыак олоххо киирэригэр тус кылааттарын киллэрбит Родион Федоровка уонна Алексей Филипповка махталын биллэрдэ. 
Бырайыак быһыытынан, Роман Дмитриев аатынан кытыл 1 км тахса усталаах. Манна 374 м усталаах куорат сөтүөлүүр сирэ киирсэр. 
Санатар буоллахха, быйыл Роман Дмитриев төрөөбүтэ 75 сылынан төрөөбүт дойдутугар Эдьигээҥҥэ эмиэ кини аатын сүгэр элбэх функциялаах спорт саалата тутуллан үлэҕэ киирбитэ. Үөрүүлээх тэрээһиҥҥэ өрөспүүбүлкэ Ил Дархана Айсен Николаевы сэргэ Роман Дмитриев доҕоро, олимпиец, норуот дьокутаата Павел Пинигин ыалдьыттаан турар. Саҥа эбийиэк Арассыыйа арктическай эргимтэтин социальнай сайыннарыы былаанынан олоххо киирбитэ. Тутуу генеральнай бэдэрээтчитэ «БАРТ-Строй» хампаанньа, диэн иһитиннэрбитэ Ил Дархан уонна Бырабыыталыстыба пресс -сулууспата.