Сомоҕолоһуу күнүгэр бастыҥ үөрэнээччилэр Арассыыйа гражданинын пааспарын туттулар 

Сомоҕолоһуу күнүгэр Куорат дууматын бэрэссэдээтэлин эбээһинэһин толорооччу Евдокия Евсикова куорат оскуолаларын үөрэнээччилэрин кытта көрүстэ.
Көрсүһүү «Разговоры о важном» кылаас чааһын халыыбынан буолан ааста. Евдокия Евсикова оҕолорго Куорат дууматын үлэтин ис хоһоонун билиһиннэрдэ, Сомоҕолоһуу күнүн историятын туһунан кэпсээтэ. Бу күн оҕолор куорат историятыттан уонна салайааччылар туһунан элбэх интэриэһинэйи биллилэр. Холобура, Евдокия Ивановна Дьокуускай куораты 1957-1961 сс. салайбыт Николай Дмитриевич Терешкин туһунан элбэҕи кэпсээтэ.
Көрсүһүү 14 саастарын туолбут 8 кылаас үөрэнээччилэригэр Арассыыйа гражданинын пааспарын туттарыынан түмүктэннэ. Кинилэр ортолоругар Национальнай гимназияттан Роман Блахиров, 9 №-дээх оскуолаттан Арина Варфоломеева, Саха гимназиятыттан Анна Кириллина, 5 №-дээх оскуолаттан Тимур Осипов, 17 №-дээх оскуолаттан Кирилл Цыденов, Саха корейскай оскуолаттан Кристина Харина бааллар, диэн иһитиннэрэр Олохтоох дьаһалта пресс-сулууспата.