Михаил Николаев төрөөбүт күнүнэн «Махтал» кэнсиэр ыытыллар

Сэтинньи 13 күнүгэр Өрөспүүбүлүкэ Бастакы бэрэсидьиэнэ Михаил Николаев төрөөбүт күнүнэн «Махтал» кэнсиэркэ ыҥырабыт, диэн иһитиннэрэр Николаев-Киин.

Тэрээһин В.А. Босиков аатынан Музыка Үрдүкү оскуолатын, Аксения уонна Наталья Посельскайалар ааттарынан балет оскуолатын, Николаев-Киин өйөбүлүнэн өрөспүүбүлүкэ биллиилээх артыыстарын уонна Дьокуускай куорат Олохтоох дьаһалтатын көҕүлээһиннэринэн ыытыллар. 
Кэнсиэр А.Е. Кулаковскай аатынан Норуоттар доҕордоһууларын дьиэтигэр күнүс 16:00 чаастан ыытыллар. Киириитэ босхо. 
Санатар буолахха, Бастакы бэрэсидьиэн Михаил Ефимович Николаев өрөспүүбүлүкэ судаарыстыбаннаһыгар уонна социальнай-экономическай сайдыытыгар уһулуччулаах кылаатын сыаналаан, Ил Дархан Айсен Николаев сэтинньи 13 күнүн Саха сиригэр Инновация күнүнэн биллэрбитэ, диэн иһитиннэрэр Ил Дархан уонна Бырабыыталыстыба пресс-сулууспата.