НОЛУОГАБАЙ ВЫЧЕТ ХАҺАН БЭРИЛЛЭРИЙ?

Судаарыстыбаттан ханнык көмөнү туһаныахтааххын билэҕин дуо? Судаарыстыбаттан араас чэпчэтиилэри, босуобуйалары анатыахха, субсидиялары ылыахха, нолуогабай вычеттары төннөрүөххэ сөп. Босуобуйалары ылыы өйдөнүмтүө эбит буоллаҕына, нолуогабай вычет туһунан боппуруоска үгүс киһи быһаарсыбат.

Ороскуоккут 13 бырыһыана нолуогабай вычет быһыытынан төннүөхтээх:

1. Дьиэни атыыластаххытына эбэтэр туттуннаххытына – 13 бырыһыан төннөр. Биир киһи үйэтигэр биирдэ төннөрөр муҥутуур улахан суумата 260 тыһ. солк.
2. Тус инвестиционнай счеттарга (ИИС) усунуос иһин – 13 бырыһыан. Сылга 52 тыһ. солк. элбээбэт.
3. Ипотека бырыһыанын иһин – 13 бырыһыан, үйэҕэ биирдэ 390 тыһ. солк. тахсыбат, биир эрэ эбийиэктэн.
4. Бэйэҕит, бииргэ төрөөбүттэргит, оҕоҕут төлөбүрдээх үөрэхтэригэр – ороскуотурбут суумаҕытыттан 13 бырыһыана. Сылга 15600 солк. тахсыбат, оҕоҕо – 6500 солк.
5. Төлөбүрдээх эмтэнии иһин – 13 бырыһыан, сылга 15600 солк. тахсыбат.
6. Аһымалга ыыппыт харчыгытыттан – 13 бырыһыан төннөр. Сылга 15600 солк. элбэх буолбат.
7. Олоххутун старховкалаан баран ол төлөбүргүтүттэн – 13 бырыһыан. Дуогабар болдьоҕо 5 сылтан элбэх буолуохтаах.
8. Судаарыстыбаннайа суох биэнсийэ пуондаларыгар усунуостартан – 13 бырыһыан, сылга 15600 солк. тахсыбат.
9. Биэнсийэ мунньуллар чааһыгар усунуостартан – 13 бырыһыан, сылга 15600 солк. тахсыбат.
10. Оҕолорго – бастакы уонна иккис оҕоҕо ыйга 182-лии солк., 3-с уонна онтон кэлэр оҕоҕо – 390-нуу солк., 1560 солк. – инбэлиит оҕоҕо. Маныаха биири бэлиэтиир тоҕоостоох, 15600 солк. – үөрэххэ, медицинаҕа, аһымалга, о.д.а. туттуллубут сууматтан вычет уопсай суумата бачча буолуохтаах. Нолуогабай вычеты официальнай үлэлээх, НДФЛ нолуогун төлүүр эрэ дьон ылар бырааптаахтар. Маны тэҥэ араас дохуоттарыттан (холобур, дьиэ куортамыттан киллэрэр дохуоттарыттан) чиэһинэйдик 13 бырыһыаны төлүүр дьон ылаллар. Нолуогабай вычет сайабылыанньанан эрэ төлөнөр.