Нэһилиэк үрдүк сыанабылын ыллылар

Хатас нэһилиэк дьаһалтатын Дьокуускай куорат төрөөбүт күнүн көрсө анаммыт дьаһалларыттан биирдэстэрэ – Бочуоттаах олохтоох ааты нэһилиэк саамай үрдүк сыанабылын дьоһун дьон ыллылар. Кинилэр кимнээҕий? Үлэлиир сирин боруогун атыллыаҕыттан үлэлээн бүтүөр диэри үтүө суобастаахтык тыа хаһаайыстыбата, чуолаан ыанньык ынаҕы көрбүт - истибит, үрүҥ илгэни үрүлүтэ сүүрдүбүт, биирдии ынахтан 4000 лиитэрэ үүтү ыар чемпион үрдүк аатын ылбыт, Үлэ Кыһыл Знамята  уордьан кавалера  Анна Ивановна Саввинова, 43 сыл оҕону иитиигэ - үөрэтиигэ, сайдар аартыгын арыйыыга анаабыт, олорор нэһилиэгин уопсастыбаннай олоҕун актыыбынай кыттааччыта, бастыҥ саахымаччыт, дуобаччыт Евгения Степановна Иннокентьева уонна оонньоммотох оҕо сааһын саҕаттан дойду туһа диэн үлэлээбит - хамсаабыт Александра Иннокентьевна Жиркова үрдүк аат хаһаайыттара буоллулар уонна нэһилиэк аҕа баһылыгын илиититтэн түөскэ кэтэр бэлиэ ыллылар, бочуоттаах кинигэҕэ илии баттаатылар.

Кинилэр үөрүүлэрин аймах - билэ дьонноро, атастара, доҕотторо, үөрэппит үөрэнээччилэрэ, үөлээннээхтэрэ үллэһиннилэр. Бу тэрээһин ''Күөх сирэмҥэ'' турар Үлэ дьонун айхаллыыр истиэндэ аттыгар буолбута туһугар долгутуулаах да, үөрүүлээх даҕаны. Манна даҕатан эттэххэ, Анна Ивановна хаартыската бу истиэндэҕэ баар. Онтон ол истиэндэ аттыгар Сиэрдээх ыал бырайыак чэрчитинэн Герой ийэлэр дьиэ - кэргэннэригэр анаммыт истиэндэҕэ Анна Ивановна төрөппүттэрэ Иван Иванович, Клавдия Егоровна Пермяковтар мөссүөннэрэ баара ама кими долгуппат, үөрдүбэт буолуоҕай? Дьэ, маны этэн эрдэхтэрэ удьуор дьону утумнаан, дьоһун дьону ситимнээн диэн. Күндү биир дойдулааҕым аах, сэргээ, сэһэргээ, киэн тутун.