Монголияттан доҕотторбут ыалдьыттаатылар

И.М. Яковлев аатынан Покровскай 1 №-дээх орто оскуолата 2015 сыллаахтан Монголия Чингэлтэй куоратын 61 № оскуолатын кытта  доҕордоһор. Бу сыллар тухары икки оскуола култуура, үөрэх эйгэлэригэр уопут атастастылар, кэнсиэртэри туруордулар. Биһиги «Хаҥаласчаан» үҥкүү бөлөхпүт оҕолоро Сахабыт сирин култууратын, үҥкүүтүн, хомуһун билиһиннэрэн, көрдөрөн кэллибит, оттон монгол доҕотторбут харда курдук эмиэ Сахабыт сиригэр хаста да ыалдьыттаан, араас тэрээһиҥҥэ, кэнсиэркэ кыттыбыттара, ыһыахха, Өлүөнэ очуостарыгар сылдьыбыттара.

Бу күннэргэ Чингэлтэй оскуолатын бүтэрбит икки үөрэнээччи, билигин Дьокуускайга Арктикатааҕы култуура уонна искусство судаарыстыбаннай   институтун устудьуоннара Оргилбаяр Нямжав уонна Батхуу Уянга биһиги оскуолабытыгар кэлэн, «Хаҥаласчаан» бөлөх үҥкүүһүт уолаттарыгар монголлуу үҥкүүлэри үөрэтэн бардылар. Ону таһынан улахан кылаас үөрэнээччилэригэр үөрэхтэрин туһунан кэпсээтилэр уонна сахалыы остуол оонньууларыгар хабылыкка, хаамыскаҕа үөрэннилэр. Бэйэлэрин биир дойдулаахтарын, Покровскайга олорор илиҥҥи бойобуой искусство көрүҥэр оҕолору дьарыктыыр монгол тренер Гансух Шагдары кытта көрсөн кэпсэттилэр, дойдуларын ахтыстылар.

Дириэктэрбит Спиридон Спиридонович устудьуон уолаттарга махтал сурук уонна хабылык, хаамыска бэлэх туттарда. Ити курдук саха уонна монгол норуоттар икки ардыларыгар доҕордоһуу салҕанар.