16.11.2021 | 17:00

Мин Кристина буолбатахпын

Мин Кристина буолбатахпын
Ааптар: Айталина Софронова

Соторутааҕыта «Саха» НКИХ ханаалыгар «Дьол тааһа» диэн сериал көстөн ааста. Дьон-сэргэ бу киинэҕэ ордук Кристина оруолун ырытта. Бу уустук уобараһы арыйбыт Ева Кузьменко – номнуо хас даҕаны киинэҕэ оонньообут артыыһын ааһан, бэйэтин Үөһээ Дьааҥыттан төрүттээхпин диэн киэн тутта кэпсиир хоту дойду Кэрэ Куота. Хотугу аҕыйах ахсааннаах төрүт омуктар театрдарын артыыһа Ева Кузьменко – «Киин куорат» бүгүҥҥү ыалдьыта.

Ева, дорообо! Ааҕааччыларбытыгар бэйэҥ тускунан кэпсии түһэриҥ буоллар.

— Туймаадабыт хочотун тапталлаах Дьокуускай куораппыт соҕотох сахалыы хаһыатын ааҕааччылара, дорооболоруҥ!

Мин киин куоракка төрөөбүтүм, улааппытым. Ол да буоллар ийэм дойдутугар Үөһээ Дьааҥыга элбэхтик сылдьар буоламмын, бэйэбин дьааҥыбын да диэн ылааччыбын. Оскуолабын Иван Шамаев салайааччылаах өрөспүүбүлүкэтээҕи лицейгэ бүтэрбитим. РК-лар үгэстэринэн диэххэ дуу, оскуолабытын бүтэрээт, бары тутуспутунан 90 % киин Арассыыйа үрдүк үөрэҕин кыһаларыгар туттарсан киирбиппит. Ол курдук мин бастакы үөрэхпин Москваҕа ылбытым, эриэккэс сир баайын-дуолун үөрэтэр инженер идэтин баһылаабытым. Хомойуох иһин, ол идэбинэн тустаах үлэ миэстэтэ суоҕуттан үлэлээбэтэҕим. Алмаастаах Мииринэйгэ ыытаары гыммыттарын, биэс сыл тухары дойдубун, дьоммун, доҕотторбун ахтыбытым бэрдиттэн, барбатаҕым. Ол сырыттахпына 2014 сыллаахха бу үлэлиир театрым арыллыбытыгар, дьылҕам бэлэҕэ дии санаат, манна үлэҕэ киирэн хаалбытым. Анал идэлээх буолаары, кэтэхтэн АГИКИ "хореография" салаатын бүтэрбитим. Ону таһынан «Государственное и муниципальное управление» үөрэҕин ылбытым. Билигин ахсыс  сылбын театр артыыһынан үлэлии-хамсыы, айа-тута  сылдьабын. Артыыс идэбин үрдэтэр санааттан кэмиттэн-кэмигэр киин сирдэргэ ыытыллар үөрэх куурустарыгар, семинардарга үөрэнэбин.

Дьон үксэ эйигин үҥкүүһүт диэн көрөр буолуохтаах...

— Дьиҥэр, култуура эйгэтигэр 3-4 сааспыттан сыстыбытым. Маҥнай «Гулун» ансаабылга үҥкүүлээн саҕалаабытым. Онтон ыла үҥкүүбүн куруук «тута» сылдьабын. Устудьуоннуур да кэммэр «Чукотка» диэн ааттаах хотугу үҥкүү ансаамбылыгар сөбүлээн дьарыктанар этим. Өрөспүүбүлүкэ Бастайааннай бэрэстэбиитэлистибэтэ ыытар тэрээһиннэригэр үҥкүүһүт да, артыыс да быһыытынан элбэхтик кыттыбытым. Бэйэлэрэ иилиир-саҕалыыр тэрээһиннэригэр, атын да куораттарга куруук илдьэ сылдьааччылар.

— Театрга кэлии мээнэҕэ буолбатах эбит.

— Оннук. Театрбыт номнуо ахсыс сезонун арыйда, репертуарбытыгар 11 испэктээкиллээхпит. Саҥа дьыл саҕана өссө биир испэктээкил тахсыахтаах, режиссер Роман Дорофеев.

Оттон киинэҕэ хаһааҥҥыттан уһуллан саҕалаатыҥ?

— Киинэҕэ оонньооһун оҕо эрдэхпиттэн илдьэ сылдьар ыра санаам этэ. Ким буолуоххун баҕараҕын диэтэхтэринэ, бэйэбин артыыс эрэ быһыытынан ойуулаан, оҥорон көрөөччүбүн. Баҕа санааны уонна ыра санааны куруук төбөҕөр эргитэ, толкуйдуу сылдьар буоллаххына, дьиҥ чахчы туолар эбит  диэн түмүккэ кэллим. Ыра санааны куйаарга ыыттаххына «үлэлиир» диэннэрэ чахчы быһыылаах. Санаан да көрдөхпүнэ, төһө эмэ атын идэҕэ үөрэммитим, атын үлэҕэ киирбитим үрдүнэн, киинэбэр тиийдэҕим дии.

Бастакы оруолгар хайдах ыҥырыллыбыккыный?

— Ити 2011 сыллаахха устудьуоннуу сырыттахпына этэ. Оччолорго «Саха» НКИХ “Суорумньу” диэн ааттаах сериалы таһаарбыта. Манна миэхэ Нуораҕана диэн ааттаах биир сүрүн оруолу биэрбиттэрэ. Уһуллан баран наһаа сөбүлээбитим эрээри, атын эйгэҕэ үөрэнэ сылдьар буоламмын, киинэҕэ, сериалга уһулларбын тохтоторго быһаарыммытым. Онтон 2018 сыллаахха театрбар үлэлии сырыттахпына биир үтүө күн продюсер Петр Хикки эрийэн, «Күлүк Хомус» диэн абааһылаах киинэҕэ ыҥырбыта. Кастины этэҥҥэ ааһан, киинэбит тахсыбыта. Дьэ, бу киинэ кэннэ улам-улам ыҥырыылар, этиилэр киирэн барбыттара. Бэйэбэр араас уобарастары боруобалаан көрөбүн.

Наһаа кутталлаах киинэ этэ дии... аҥаардас көрө олорон да этиҥ сааһа арыллыах курдук. Маннык уһулларгар сиэри-туому тутуһаҕын, ыраастанаҕын дуо?

— Биллэн турар, “ужас” киинэлэргэ оонньоон баран, киһи ыраастанар. Сиэри-туому киинэҕэ эрэ буолбакка, олохха-дьаһахха куруук тутуһа сатыыбын. Сахалыы иитиилээх буоламмын, дьиҥ олох ирдэбилигэр, көстүүтүгэр уонна өбүгэ үгэһигэр итэҕэйэбин.

Мин маннык саныыбын. Артыыс идэтин талбыт буоллаххына, ханнык баҕарар оруолу оонньуохтааххын. Туохтан толлон турбакка, саллыбакка, инниҥ хоту баран иһиэхтээххин. Бу – идэ. Талан ылбыт, баҕарбыт үлэҥ диэн. Иккис өттүнэн, артыыс уонна кини толорор оруола – тус-туһунан дьон. Артыыстан сүктэриллибит оруолу көрөөччүгэ итэҕэтиилээхтик тиэрдии эрэ ирдэнэр. Ол иһин оруоллары кыра-улахан, ыарахан-чэпчэки диэн араарбаппын, барытын боруобалыы сатыыбын.

Дьэ, «Дьол тааһа» сериалга Кристина Егорова оруолун бэрт итэҕэтиилээхтик оонньоотуҥ.

— Бу сериалга сүрүн оруолга Степан Сивцев-Доллу уһулла сылдьан олус хомолтолоохтук биһиги олохпутуттан туораабыта. Инньэ гынан уһуллар кэммит уһаан биэрбитэ. Дьиҥинэн, киинэ эрдэ тахсыахтааҕа.

Оттон чуолаан сериал жанрын туһунан кэпсээтэххэ, урут сэмээр сахалыы сериаллары хайдах усталлара, артыыстары кимнээх сүүмэрдииллэрэ буолла диэн санаан ылар этим. Арай биир күн массыынанан айаннаан истэхпинэ төлөпүөн тырылаата, билбэт нүөмэрим. Дьиҥэр, айаннаан иһэн төлөпүөҥҥэ эппиэттээбэт идэлээхпин. «Саха» НКИХ-тан эрийэбит, сериал уһуллаары турар, эйигин биир оруолга көрөбүт, биһиэхэ кэлэ сылдьарыҥ буоллар”, - диэтилэр. Тута омсолоох, мөкү соҕус уобарас диэн сэрэттилэр. Тиийдим. Сериаллар отделларын салайааччыта Марфа Пермякова көрүстэ. «Дьол тааһыгар» ити курдук кэлбитим.

Үгүс көрөөччү Кристинаны абааһы көрдө ээ.

— Көрөөччү оруолу абааһы көрбүт буоллаҕына, ол аата артыыс оруолун сөпкө арыйбыт диэн буолар. «Дьол тааһын» кэнниттэн сорох дьон социальнай ситиммэр суруйан кыыһыраллар, мөҕүттэллэр, үөхсэллэр. Аахайбакка буола сатыыбын. Барыларыгар ити мин буолбатах, ити Кристина диэн персонаж диэн быһааран биэрэр уустук. Ону өйдүүр киһи өйдүүр. Бу уобарас миэхэ, мин дьиҥ олохпор ханан даҕаны сөп түбэспэт. Кристина биһикки тус-туһунан майгылаах, эйгэлээх, санаалаах-оноолоох дьоммут.

Инники былааннаргыттан сэгэтэ түһэриҥ буоллар?

— Өссө даҕаны интэриэһинэй бырайыактарга үлэлээбит киһи диэн баҕа санаалаахпын, үлэм сүнньүнэн эмиэ бэрт кэскиллээх түгэннэр күүтэллэр. Бары дьоллоох, доруобай, чэгиэн буолуҥ!

Кэпсэтииҥ иһин махтанабын! Айар үлэҕэр саҥа саҕахтары баҕарабын!

Сонуннар

28.05.2022 | 11:57
Клещ кэллэ!

Ордук ааҕаллар

Оҕуруот аһын олордооччуларга саҥа субсидия көрүллүөҕэ
Сонуннар | 18.05.2022 | 15:00
Оҕуруот аһын олордооччуларга саҥа субсидия көрүллүөҕэ
«Развитие овощеводства и картофелеводства» саҥа федеральнай бырайыак чэрчитинэн субсидия бэриллэр буолуоҕа. Манан дьоҕус уонна орто предпринимателлэр, маны сэргэ, “самозанятайдар” уонна кэтэх хаһаайыстыбалаах дьон эмиэ туһаныахтарын сөп. Ол курдук, судаарыстыба хортуоппуйу уонна да атын оҕуруот аһын олордуунан дьарыктанар оҥорон таһаарааччылары өйүүр миэрэлэри кэҥэтиэҕэ. Бу туһунан уураахха Арассыыйа бырабыыталыстыбатын бэрэссэдээтэлэ Михаил Мишустин...
Сааскы Ньукуолун — күөххэ үктэнии өрөгөйө
Тускар туһан | 20.05.2022 | 14:00
Сааскы Ньукуолун — күөххэ үктэнии өрөгөйө
Ыам ыйын 22 күнэ – сааскы Ньукуолун. Кыһыҥҥы Ньукуолун ахсынньы 19 күнүгэр бэлиэтэнэр (День святого Николая Чудотворца) Таҥара дьиэтин  бырааһынньыга.   Саха дьонугар былыр-былыргыттан сааскы Ньукуолун күнэ олус ытыктанар, улахан суолталаах, күүтүүлээх. Бу күн уһун кыһыны этэҥҥэ туораан, күөххэ үктэнии үөрүүтэ-өрөгөйө буолар. Мөккүөрдээх соҕус да буоллар, бу күнү сорохтор өссө саха...
Бүтүн агробөһүөлэги туттарбыт салайааччы
Дьон | 22.05.2022 | 12:00
Бүтүн агробөһүөлэги туттарбыт салайааччы
Үлэ ситиһиилээх буолуутун төрдө – сатабыллаах, далааһыннаах быһаарыныылары ылынар салайааччы. Өссө ааспыт үйэ 60-с сылларыгар, этэргэ дылы, үрэх баһа дойдуга бүтүн агробөһүөлэги туттаран бүгүн даҕаны уос номоҕор сылдьар бөдөҥ салайааччы Иван Васильевич Николаев туһунан “Бырааттыы Мординовтар” музейы салайар Сардана Александровна Васильевалыын кэпсэттибит.   – Сардана Александровна,  Саха АССР төрүттэммитэ 100 сылынан...