Медицина киинигэр бастакы бэрэсидьиэн өйдөбүнньүк кэбиниэтэ арылынна

Сэтинньи 13 күнүгэр, Саха сирин бастакы бэрэсидьиэнэ Михаил Ефимович Николаев төрөөбүт күнүгэр, өрөспүүбүлүкэтээҕи 1-гы №-дээх балыыһаҕа – М.Е. Николаев аатынан Медицина национальнай киинигэр Михаил Николаев өйдөбүнньүк кэбиниэтэ арылынна диэн Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.

Тэрээһиҥҥэ өрөспүүбүлүкэ салалтатын бэрэстэбиитэллэрэ, медицина киинин кэлэктиибэ, Михаил Ефимович Николаев кыыһа Ольга Андросова кытыннылар.

Санатар буоллахха, Медицина национальнай киинэ 1993 сыллаахха бастакы бэрэсидьиэн Михаил Николаев Ыйааҕынан тэриллибитэ. Былырыын Ил Дархан Айсен Николаев, Михаил Ефимович киин тэриллиитигэр уонна доруобуйа харыстабылыгар сүҥкэн кылаатын иһин, кини аатын Медицина киинигэр иҥэрбитэ.

Өйдөбүнньүк кэбиниэккэ бастакы бэрэсидьиэн хаартыскалара, суруйуулара, кинигэлэрэ, тус тэриллэрэ бааллар. Манна сылдьыбыт киһи өрөспүүбүлүкэ устуоруйатын, Михаил Николаев чаҕылхай олоҕун-дьаһаҕын, кэскиллээх үлэтин кытта ыкса билсиһэр кыахтаах.