Ленин проспегын өрөмүөнүн нэһилиэнньэ туох диирий?

Евгений:

— Итэҕэстэр син кыралаан бааллар эбит диэн көрөбүн. Ол эрээри салалта да, оҥорооччулар да бэйэлэрэ да көрө сылдьар буолуохтаахтар. Биллэн турар, киин уулуссабыт оҥоһуллубута наһаа үчүгэй, хаамарга олох оһуобай буолбут. Куорат дьоно хас эмэ сыллаах баҕа санаабыт олоххо киирбититтэн үөрэбит эрэ.

Анна:

— Суол оҥоһуллуохтааҕын оҥоһуллар дии саныыбын. Улахан итэҕэстэр, сыыһалар бааллар диэн этэр кыаҕым суох. Урукку сыллары кытта тэҥнээтэххэ, киин куораппыт быдан тубуста, сайынна. Мин өйдүүрбүнэн, 70-с сылларга саҥардыы кумах кутан саҕалаабыттара, онтон аспаал ууруллубута. Биһиги онно хайдах эрэ саҥа тыын киирбитин курдук санаммыппыт. Оччолорго бастаан проспегы аспааллаабыттара, ол эрэ кэннэ куорат атын уулуссаларын аспааллаан барбыттара.

Билигин куорат маастар-былаанынан тас көстүү барыта биир истииллээх буолар дэһэллэр, мин бу ыҥырыыны кытта сөбүлэһэбин.

Динара:

— Өрөмүөн өссө да бүтэ илик эрээри, урут бу маннык кэлээскэлээх сылдьарбын өйдөөбөппүн. Барыта бүттэҕинэ дьэ көрүөхпүт дии саныыбын. Мин куттанарым диэн – уу түһэр лотуоктарыгар оҕо кэлээскэтин көлүөһэтэ кыбыллан хаалыах курдук.

Григорий:

— Проспект оҥоһуллубута наһаа үчүгэй. Урукку сыллары кытта тэҥнээн көрдөххө, чыҥха атын хартыына. Мин куруук соҕотох сылдьар буоламмын, оҕолоох, кэлээскэлээх дьоҥҥо туох эмэ хааччах баар да буоллаҕына, этэр кыаҕым суох.

Елизавета:

— Үлэ бүттэҕинэ эрэ уопсай сыанабыл бэриллиэ дии саныыбын, билигин даҕаны өрөмүөн бара турар. Барыта ситтэҕинэ, олох үчүгэй буолуо этэ. Куорат олохтоохторо уонна ыалдьыттара Ленин проспега оҥоһулларыттан үөрэбит эрэ. Инникитин көҕөрдүүгэ күүскэ болҕомто уураргыт буоллар. Манна биири этиэм этэ – көҕөрдүүгэ саастаах дьону, биэнсийэлээхтэри сыһыарыахха наада. Кинилэр, мин санаабар, үөрүүнэн олордон биэриэ этилэр, буор босхо даҕаны. Мин бэйэм дьиэм иһигэр сибэкки олордобун.  Бэтэрээннэр, саастаах дьон куораты тупсарыыга үөрүүнү кытта көмөлөһүө, бэйэлэрин кылааттарын киллэриэ этилэр. Бу санаабын салалтаҕа тиэрдэргит эбитэ буоллар.

Анисия:

— Уулусса оҥоһуллубута наһаа үчүгэй. Чахчы, олус кэҥээбит, ырааһырбыт. Итэҕэстэр бааллар эрэ, суох эрэ, ону көрбөтүм. Түгэнинэн туһанан куорат салалтатыгар махталбын биллэриэхпин баҕарабын.

Екатерина:

— Киин уулусса өрөмүөннэнэрэ үчүгэй бөҕө буоллаҕа дии. Ол да буоллар бэлисипиэт суолугар сорох сирдэринэн уулуссаҕа тахсыы суох эбит, холобура, «Туймаада” маҕаһыын аттыгар. Суолбут кэҥээбитэ, тротуар саҥардыллыбыта туох даҕаны ааттаах. Бэйэм куорат киинигэр олоробун, ол иһин күн ахсын сатыы саҥа проспегынан сылдьабын.

Бу курдук дьон санаатын иһиттибит. Чахчы, куорат дьоно киин уулусса оҥоһулла турарыттан үөрүүлэрэ үксээбит, санаалара чэпчээбит