«Үлэ кыбаарталыгар» SMART-библиотека филиала арылынна

Н.Д. Неустроев аатынан «SMART-библиотека филиала «Үлэ кыбаартала» креативнай кластерга үлэтин саҕалаата. Ол курдук, библиотека 2023 сыл от ыйыттан «Үлэ кыбаарталыгар» резиденинэн киирэн, куорат Промышленнай уокуругун олохтоохторун кытта үлэни ыытар.
Дьокуускай куораттааҕы библиотека тиһигин киинин дириэктэрэ Нюргуяна Решеникова бэлиэтээбитинэн, Промышленнай уокурукка SMART-библиотека бу бастакы стационара. «Бу библиотека Арассыыйа Сбербаанын Бырабылыанньатын бэрэссэдээтэлэ Герман Греф өрөмүөн ыытарга уонна миэбэл атыылаһарга 10 мөлүйүөн солкуобайы, уонна 5 мөлүйүөн курдугу компьютернай тиэхиньикэнэн уонна технологиялар архыыптарынан хааччынарга көмөлөһөн арылынна. Уларсыы барыта автоматизированнай. Кинигэбит элбэх. «Сбер» тэрилтэ эбии олус интэриэһинэй уонна мотивационнай кинигэлэри бэлэхтээтэ. Онон биһиги библиотекабытыгар «Үлэ кыбаартала» кластер резиденнэрэ эрэ буолбакка, куорат Промышленнай уокуругун олохтоохторо эмиэ сөбүлээн сылдьыахтара диэн эрэнэбит», - диир Нюргуяна Решетникова.
Санатар буоллахха, ааспыт сыл сэтинньи ыйыгар креативнай кластерга Сбербаан бырабылыанньатын бэрэссэдээтэлэ Герман Греф кэлэ сылдьан, бииргэ үлэлэһэр уонна өйүүр санаалааҕын биллэрбитэ, диэн иһитиннэрэр Олохтоох дьаһалта пресс-сулууспата.