18.12.2019 | 10:12

«КЫҺЫН САХА СИРИТТЭН САҔАЛАНАР»

«КЫҺЫН САХА СИРИТТЭН САҔАЛАНАР»
Ааптар: Киин Куорат
Бөлөххө киир

Саха сиригэр туризм сайдыытын көҕүлүүр аналлаах «Кыһын Саха сириттэн саҕаланар» бэстибээлбит саҕаланна. Быйыл тэрээһин  сэтинньи 25 күнүттэн ахсынньы 1 күнүгэр диэри буола турар. Нэдиэлэ устата киин куораттан саҕалаан Тымныы Полюһун Өймөкөөн улууһугар тиийэ араас хабааннаах үгэскэ кубулуйбут тэрээһиннэр ыытыллыахтара. Кыһыҥҥы туризм бэстибээлэ Саха сиригэр, хоту дойдуга олорор норуоттар ураты дьикти култуураларын, астарын-үөллэрин, омук быһыытынан уратыларын туоһулаан Аан дойду үрдүнэн улахан болҕомтону ылыан ылла.

НАМҤА МУҤХА-2019

Сэтинньи 29 күнүгэр бэстибээл чэрчитинэн аан маҥнайгытын Нам улууһугар «Мунха-2019» ыытыллыаҕа. Омук сириттэн кэлбит туристарга уонна ыҥырыылаах ыалдьыттарга мууһунан бүрүллүбүт күөлтэн балыктыыры көрдөрүөхтэрэ. Итиэннэ сылгы сиэлиттэн ураты оҥоһуктары, Саха сирин төрүт омуктарын национальнай аһылыктарын амсайыахтара, атынан хатааһылатыахтара.

МУУСТААХ УУГА СӨТҮӨЛЭЭҺИН

Бу ураты экстремальнай күрэх эмиэ аан бастаан ыытыллар. «Тэрийээччилэр баҕа санаабыт диэн, ыалдьыттар олохтоохтор хайдах курдук тулуурдаахтарын, доруобайдарын, төһө даҕаны тымныы сиргэ олордоллор,  Сахаларын сирин хайдах күүскэ таптыылларын билиэхтэрин баҕарабыт», — диир тэрийээччи,  атыы-эргиэн уонна туризм миниистирэ Ирина Высоких.

ХААР, МУУС ОҤОҺУКТАР

«Кыһын Саха сириттэн саҕаланар» бэстибээл ыытылларын тухары хаар, муус оҥоһуктарга дьоһун болҕомто ууруллар. Быйыл даҕаны Орджоникидзе болуоссатыгар Муус куораты оҥоруу саҕаламмыта үһүс күнэ. Быйылгы тэрээһиҥҥэ уопсайа 25 хамаанда кыттыыны ыла сылдьар, онтон аҕыһа – аан дойду араас муннуктарыттан кэлбит ыалдьыттар. Маастардар үлэлэрин Хабаровскай куораттан кэлбит ыҥырыылаах ыалдьыт сыаналыыр.

САХА СИРИН АМТАНА

Үгэс буолбут «Саха сирин амтана» ас-үөл бэстибээлэ быйыл үбүлүөйдээх бэһис төгүлүн ыытыллар. Манна Дьокуускай куорат бастыҥ рестораннара кытталлар. Асчыттарбыт быйыл даҕаны ыалдьыттары бииртэн биир деликатеһынан соһутардыы оҥосто сылдьаллар. Ол курдук, норуот төрүт үгэстэригэр олоҕурбут бастыҥ астарын «Своя компания», «Карлсон», «Крыша», «Муус Хайа», «Река-озеро-лес», «Мясо есть», «Каре», Kitchen, «Тыгын Дархан», «Усадьба Атласовых», «Махтал» о.д.а. амсатыахтара. Бэстибээл сүрүн ыҥырыылаах ыалдьыта — биллэр шеф-повар, International del Chef анал аат хаһаайына Рашид Рахманов.

КЫҺЫҤҤЫ ОҺУОР

Тоһуттар тымныыбыт кэрэни кэрэһилиирин хоһуйар «Түннүкпүтүн түүн кэлэн түүлүнэн ким киэргэттэ» диэн тыллардаах хоһоону хас биирдии саха оҕото билэр. Быйыл предпринимательство министиэристибэтэ, Дьокуускай куорат дьаһалтата, «Көмүлүөк» хампаанньа, «Көмүлүөк тула» арт-кулууп айар дьону көҕүлүүр худуоһунньуктар куонкурустарын ыыталлар.

«Айар талааннаах көҥүл худуоһунньуктары өйүүр уонна кинилэргэ тирэх буолар аналлаах «Саха сирин кыһыҥҥы оһуора» куонкуруһу тэрийэбит. Национальнай култуурабыт сайдыыта айар-тутар дьоҕурга сытарын туоһулуохпут»,диэн этэр «Көмүлүөк» хампаанньа салайааччыта Ольга Григорьева.

Бу түһүмээхэ ким баҕалаах кыттар. Балаһыанньа быһыытынан, уруһуй булгуччу кыһыҥҥы тиэмэҕэ аналлаах буолуохтаах. Интэриэстээх дьону Ленин проспегын 36-с нүөмэрдээх дьиэтигэр күүтэллэр.

КЫҺЫҤҤЫ ТҮБҮКТЭР

Саха сиригэр массыынаны таһырдьа туруорар сабыы, истээх ыстаан курдук туһалаах табаардары оҥорон таһаарыы саҕаламмыта ыраатта.  Сэтинньи 29—ахсынньы 1 күннэригэр «Триумф» спорт киинигэр «Саха сирин кыһыҥҥы таҥаһа» диэн быыстапка-дьаарбаҥкаҕа маны барытын билсиэххэ сөп.

ХААРТЫСКАНАН ФОТОМАРАФОН

Эмиэ биир ураты киллэриинэн хаартыска күрэҕэ буолар. «Ниже нуля» диэн ааттаах куонкурус чуолаан туристарга ананар. Манна кинилэр Саха сирин тымныытын үс чаас иһигэр хаартыскаҕа түһэриэхтэрэ. Бастыҥ үлэлэр киин куорат оптуобус тохтобулларыгар ыйаныахтара.

СПОРТ

Спортивнай тэрээһиннэр быйыл да өрө көтөҕүллүүлээхтик ыытыллыахтара. Сүүрүү, ыстаныы, тустуу барыта буолуоҕа.

«ТОҤ БАЛЫК-2019»

Дьон-сэргэ кутун туппут «Тоҥ балык-2019» тэрээһин «Триумф» кииҥҥэ ахсынньы 1 күнүгэр ыҥырар. Тэрийээччилэр ааспыт сыллардааҕар өссө тыҥааһыннаах күрэҕи эрэннэрэллэр. Ону сэргэ быйыл «Тойон Балык» диэн саҥа түһүмэх эбиллибитин бэлиэтииллэр. Ыалдьыттарга анаан хотугу норуоттар култуураларын быыстапката үлэлиэҕэ.

КҮӨХ ХАРЫЙА УМАЙАР

Лаглайбыт күөх харыйабыт симэнэн саҕалаабыта оруобуна икки нэдиэлэ буолла. Ол саҕана таһырдьа арыый сылаас этэ. «Кыһын Саха сириттэн саҕаланар» бэстибээл Орджоникидзе болуоссаттыгар Саҥа дьыллааҕы күөх харыйаны уматыынан түмүктэниэҕэ. Бу күн Чысхаан Тымныы Моруос оҕонньорго кыһын саҕаламмыт бэлиэтин — Тымныы полюһуттан, Өймөкөөнтөн  аҕалыллыбыт тымныы анал бэлиэтин туттарыаҕа. Бу кэннэ Моруос Оҕонньор Арассыыйа киин куораттарынан кыһын кэлбитин кэпсии барыаҕа. Маны таһынан, кыһын кэлбитинэн сибээстээн оҕо социальнай кииннэригэр Саҥа дьыллааҕы бэлэхтэри уунуохтара.

Кыһыҥҥы туризм бэстибээлэ бүгүҥҥү күҥҥэ Арассыыйаҕа биир бастыҥ тэрээһининэн биллэр. Ааспыт сылтан норуоттар икки ардыларынааҕы суолталаммытынан, аан дойду хайа баҕар муннугуттан элбэх турист биһиги Сахабыт сирин билсиэхтэрэ.

Сонуннар

Ордук ааҕаллар

Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Арыгы атыытын бобуутун полиция үлэһиттэрэ хонтуруоллуохтара
Сонуннар | 08.06.2024 | 11:51
Арыгы атыытын бобуутун полиция үлэһиттэрэ хонтуруоллуохтара
Куорат баһылыга Евгений Григорьев дьаһалынан VIII-с «Азия оҕолоро» Оонньуулар ыытыллар кэмнэригэр бэс ыйын 25 күнүттэн  от ыйын 8 күнүгэр диэри Дьокуускай куоракка арыгылаах утах атыыта бобуллар. Ол эбэтэр бу күннэргэ арыгылаах утах атыытыгар идэтийэр эргиэн туочукалара сабыллаллар, атын маҕаһыыннарга арыгы атыылыыр отделлар үлэлээбэттэр.  Бу хаарчах арыгынан эргинэр кафе, ресторан, бар...
Дьахтар киэли хапчаҕайын искэниттэн өлүө суохтаах
Сонуннар | 07.06.2024 | 10:00
Дьахтар киэли хапчаҕайын искэниттэн өлүө суохтаах
Искэн төрүүр-ууһуур саастаах эдэр дьахталлары булара аан дойду онкогинеколог быраастарын ордук дьиксиннэрэр. Саха сиригэр дьахтар аймах ортотугар киэли хапчаҕайын араага (рак шейки матки) эмиий искэнин кэнниттэн иккис миэстэҕэ турар уонна онкология ыарыытыттан өлүү биир сүрүн төрүөтүнэн буолар. Хомойуох иһин, дьахтар аймах 83%-на балыыһаҕа хомнуо-хойут, ыарыы хайыы үйэ ытарчалыы ылбытын кэннэ...
Үөрэнээччилэр спартакиадалара
Спорт | 07.06.2024 | 12:00
Үөрэнээччилэр спартакиадалара
Өрөспүүбүлүкэ үөрэнээччилэрин спартакиадата бэс ыйын 6-10 күннэригэр спорт 29 көрүҥэр 35 улуустан 1700 оҕо кыттыылаах буолуоҕа.  Бу туһунан билиһиннэрэр пресс-конференцияны Саха Өрөспүүбүлүкэтин үөрэххэ уонна наукаҕа миниистирин солбуйааччы Альбина Аргунова, “Спортивные якутяне” Киин дириэктэрин солбуйааччы Александр Брызгалов уонна Спартакиада сүрүн судьуйата Юрий Балаганскай иһитиннэрдилэр. Спартакиада кыайыылаахтарыгар туттарыллыахтаах Кубоктар, мэтээллэр, спортсменнар экипировкалара...