Куораты көҕөрдүү уонна тупсарыы кыһалҕаларын дьүүллэстилэр

Куорат Уопсастыбаннай палаататын сэбиэтэ алтынньы 4 күнүгэр куорат баһылыгын тупсарыы, көҕөрдүү боппуруостарыгар сүбэһитэ Екатерина Павлованы кытта көҕөрдүү уонна тупсарыы кыһалҕаларын дьүүллэстилэр.
Сүрүн болҕомто мастары уонна ыарҕалары кырыйан кэрэ быһыылаан-таһаалаан биэрии, пааматынньыктар тастарын, кураанах сирдэри күөх үүнээйинэн киэргэтии тула нэһилиэнньэттэн киирбит этиилэргэ уурулунна. 
Ол курдук, Сэбиэт кэнэҕэһин үөрэх тэрилтэлэригэр көҕөрдүүгэ уонна «Киин куорат күөх кубога» күрэххэ кыттыыга анал семинардары, маастар-кылаастары ыытарга быһаарда. Маны сэргэ Екатерина Павлованы «Главстрой» МХТ саҥа эбийиэктэри бырайыактыырыгар көҕөрдүү чааһыгар консультанынан хамыыһыйа састаабыгар киллэрэргэ быһаарда.
Екатерина Павлова көҕөрдүү үлэтэ пааспарданыахтааҕын, хас биирдии мас реестргэ киириэхтээҕин тоһоҕолоото. Оттон куораты көҕөрдүү чугастааҕы былааныгар Ларионов уулуссата уонна Роман Дмитриев аатынан кытыл, 2026 сылга Поярков уулуссата турарын бэлиэтэтээтилэр.
Маны таһынан алтынньы 7 күнүттэн 11 күнүгэр диэри Уопсастыбаннай палаата сэбиэтэ Улуу Кыайыы 80 сылынан «Үйэлээх уот» мемориалы тупсарыы боппуруоһун дьүүллэһэр, чинчийэр былааннаах, диэн итиһиннэрэр Дьокуускай куорат Уопсастыбаннай палаататын сэбиэтэ.