Куорат пааркатыгар экологическай ыллык баар буолла

От ыйын 16 күнүгэр Дьокуускайга Култуура уонна сынньалаҥ пааркатыгар экологическай ыллык арылынна. Бу – В.П. Ларионов аатынан Физико-тэхиньиичэскэй лицей (ФТЛ) үөрэнээччилэрэ Бүтүн Арассыыйатааҕы «Движение Первых» Граннар күрэхтэригэр ситиһиилээх кыттыыларын түмүгэ.
Ол курдук, Саха сириттэн кыттыбыт 100-тэн тахса тэрилтэттэн биэһэ кыайыылаах аатын ылбытын, ол иһигэр Дьокуускай куораттааҕы В.П. Ларионов аатынан Физико-тэхиньиичэскэй лицей «Эко+» бырайыагынан 7-с миэстэҕэ тиксэн, 1 820 000 солк. суумалаах  Грант хаһаайына буолары ситиспитин «Киин куорат» суруйан турар.

Бу күннэргэ Дьокуускай куораттааҕы Култуура уонна сынньалаҥ пааркатыгар экологическай ыллыгы тэрийиигэ туһуланар «Эко+» бырайыак номнуо олоххо киирдэ. Бырайыагы көҕүлээччинэн ФТЛ 7-с кылааһын үөрэнээччитэ Мария Степанова буолар. Мария бу бырайыагынан кини куорат усулуобуйатыгар үөскүүр, үүнэр окко-маска, үөҥҥэ-көйүүргэ, хамсыыр харамайга барытыгар харыстабыллаах сыһыан наадатын көрдөрөр сыаллаах. Кыыс бэйэтэ бэс мас таас куорат усулуобуйатыгар үүнэрин чинчийэр научнай үлэлээх.
ФТЛ үрдүкү кылааһын үөрэнээччилэрин сэбиэтин бэрэссэдээтэлэ Артем Еремеев экологическай ыллыкка туруорбут ыйынньыктары оҥорорго элбэх үлэ барбытын кэпсиир. Бэлиэтээн эттэххэ, ФТЛ үөрэнээччилэрэ 2017 сыллаахха Кэҥкэмэ территориятыгар эмиэ эколологическай ыллыгы тэрийэн тураллар. 

Оттон «Эко+» бырайыак партнердарынан Култуура уонна сынньалаҥ паарката, «Дьокуускай куорат уопсастыбаннай туоналарын салайар киин» муниципальнай тэрилтэ, СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтэ, СӨ «Юные якутяне» ресурснай киинэ, Арктикатааҕы судаарыстыбаннай агротехнологическай университет уонна РНА СС Криолитозона биологическай кыһалҕаларыгар института буолаллар.
«Движение Первых» граннар күрэхтэригэр Арассыыйа араас регионуттан 6 тыһыынча кэриҥэ сайаапка киирбит (Ил Дархан уонна Бырабыыталыстыба пресс-сулууспатын матырыйаалыгар сигэнэн). Хаартыска: Дмитрий Тымыров, «Движение Первых» CӨ салаата.