Куорат онлайн үлэлиир

Дьиэҕэ хаайар дьаҥ аан дойдуну биир гына тарҕанан, олохпут тосту уларыйда. Дьиэттэн тахсыбакка олорон, дьыаланы-куолуну барытын онлайн оҥорор кыахтаах эбиппитин дьэ кэлэн өйдөөтүбүт.

Дьиҥэ, олохпутугар электроннай өҥөлөр киирбиттэрэ балай эмэ буолла. Көннөрү ханнык эмэ ыспараапканы, докумуону эт атахпытынан хааман тиийэн, эт илиибитинэн кумааҕыга илии баттаан ыларбытын, туһааннаах уорганнар бэрэстэбиитэллэрин кытта сирэй көрсөн кэпсэтэрбитин астынар этибит. Сорох дьон оннооҕор уочаракка туралларыттан дуоһуйууну ылар буолаллара.

Ону баара... Коронавирус диэн хара хамсык олохпут укулаатын букатын уларытан кэбистэ.

Онлайн үлэҕэ Дьокуускай куорат дьаһалтатын бары салаалара киирдилэр. Маны сыстыганнаах вируһу уодьуганныыр сокуон кытаанахтык ирдиир. Ол курдук, Эпиэкэ уонна бэпэчиитэлистибэ салаата билигин кими да приемнаабат. Ыйытыылаах дьону төлөпүөнүнэн эрэ билсэргэ ыҥыраллар – 40-88-32.

Баай-дуол  уонна сир сыһыаннаһыыларын Департамена эмиэ дьону кытта сирэй көрсөн толорор үлэтэ тохтоон турар. Төлөпүөннэрэ: 40-88-09.

Предпринимательство, потребительскай ырыынак уонна туризмы сайыннарыы Департамена – 40-80-93.

Олох-дьаһах хомунаалынай хаһаайыстыбатын уонна энергетика Департамена – 40-80-68.

Тыа хаһаайыстыбатын управлениета – 40-88-43.

Сокуоннай саастарын ситэ илик оҕолор дьыалаларын хамыыһыйата – 40-80-92.

Архитектура уонна тутуу Департамена – 42-90-91.

Суол-иис управлениета – 42-96-16.

Култуура уонна духуобунай сайдыы управлениета – 40-88-35.

Ыччат уонна дьиэ кэргэн политикатын управлениета – 40-88-46.

Үөрэхтээһин управлениета (приемнай төл.: 40-80-50) – нэһилиэнньэ билигин саамай наадыйар, элбэх ыйытыы үөскүүр салаата. Тоҕо диэтэххэ, билигин оҕолор уһуйааҥҥа путевкалары ылан эрэр буолуохтаахтар этэ. Коронавирус тарҕаммытынан, оҕо саадыгар путевкалары түҥэтии, оскуолаҕа киирии боппуруостарын быһаарыы уонна да атын үлэ барыта тохтоон турар.

Маны таһынан, суругунан киллэрэр этиилэргэ, сайабылыанньаларга анаан дьаһалта дьиэтин бастакы этээһигэр, киирээти кытта, салаа-салаа аайы туһунан почта дьааһыктара турдулар. Прием оҥоһуллубат эрээри, үлэ тохтообот. Суругунан киирэр докумуоннары күннэтэ көрөллөр.