23.08.2021 | 17:00

Крымҥа айаннааччыларга сүбэлэр

(суоллааҕы бэлиэтээһиннэртэн)
Крымҥа айаннааччыларга сүбэлэр
Ааптар: Айыына Ксенофонтова

Соторутааҕыта кэрэ айылҕалаах Крым Евпатория диэн куоратыгар астына сынньанан, күнтэн күүс ылан, муора салгынынан дуоһуйа тыынан кэллибит. Бүгүҥҥү балаһаҕа тугу билбиппин-көрбүппүн, туохтан соһуйбуппун, тугу сэргээбиппин түмтүм. Айанньыттарга туһалаах иһитиннэриини, соргулаах сүбэлэри бэлэмнээтим.

Мобильнай бааҥҥа эрэнимэҥ. Мантан харчы устан тиийэр ордук. Үгүс маҕаһыыннарга, ырыынакка, кыра лааппыларга төлөбүрү уу харчынан ылаллар. Каартаҕар элбэх харчылаах эрээри, хараххынан хайҕаабыккын сатаан атыыласпакка эрэйдэниэххин сөп.

Оптуобуска бырайыас. “МИР” каартанан төлүүр барыстаах – 17 солкуобай. Киирэн иһэн, даҕайан ааһаҕын, туох да муоҕа-чуоҕа суох төлөбүрү ылаллар. Оттон уу харчынан 22 солкуобайы көрдүүллэр. Манна эбэн эттэххэ, оптуобус суоппардара сорох тохтобуллары биллэрбэккэ, ааһа барыахтарын сөп. Онон тахсарга эрдэттэн бэлэмнэниҥ.

Крымҥа иһэр уу – тыын боппуруос. Сыаната ыарахан. Биһиги манна 19 л ууну 100 солк. сакаастаан ылар буоллахпытына, онно 0,5 л бытыылкалаах ууну 180 солк. атыылаһыаххыт. Ити “Банановая республика” аквапаарка сыанатын холобурдаатым. Бастакы күннэргэ маҕаһыынтан 5 л ууну 53 солк. атыылаһа сылдьыбыппыт. Арай көрдөхпүтүнэ, дьон 5 л бытыылкаларын туппутунан, “Талая вода” диэн суруктаах автомакка уочараттаан тураллара. Онно 1 лиитирэ уу 3 солк. Бастакы сырыыга атыылаһан баран, бытыылкаҕытын бырахпакка, анал автоматтан куттар буолуҥ. 

Аэропортан тахсыы – туспа сүпсүлгэн. Биһиги билэр дьоммут биэрбит таксиларын сакаастаабыппыт, сөмөлүөт кыайан көппөккө, киэһэ хойут тиийбиппит. Онуоха айаммыт сыаната үрдээн соһуппута. Кинилэргэ киэһэ, кнопканы баттаабыт курдук, олус түргэнник хараҥарар. Ол иһин түүҥҥү тарыып үрдүүр. Куорат иһигэр “Максим” такси сыаната удамыр дииллэр. 

Манна даҕатан эттэххэ, биһиги куораппыт уулуссалара хараҥа диэн муҥатыйабыт да, ытыс таһынар хараҥа уулуссалар, киэһэ иннэ-кэннэ көстүбэт уһун да уһун суоллар онно бааллар. Онно холоотоххо, Дьокуускайбыт сандааран, олус сырдык эбит!

Сайдыы.  Олохтоохтор Арассыыйа састаабыгар киирэн абыранныбыт диэн кэпсииллэр. Аҥаардас суол тутуута тэтимнээхтик ыытыллар. Бу иннинэ “быраҕыллыбыт”, “умнуллубут” курдук олорбуппут дииллэр. 

Уулуссалара кыараҕас. Аны туран, “пробка” диэн онно баар эбит. Хас да чаас кутуйах хаамыытынан айанныахха сөп. Суоппардар этэллэринэн, сүрүн биричиинэтэ – сатыы дьон суолу туоруур сирдэрэ олус элбэх. “Камера элбэх, хайыаххыный, ыстарааптаммат туһуттан барыларын аһардаҕын”, – диэн Алексей кэпсиир.

Сибээс мөлтөх. Сорох күн интэриниэт сүтэр. Ол иһин ыксаабыт киһи эрийэн кэпсэтэрэ ордук.

Олохтоох бородууксуйа арааһа элбэҕэ сөхтөрдө: халбаһыттан саҕалаан, мороженайыгар тиийэ баар. Үрүҥ ас дэлэй, сыаната удамыр. Ол эрээри фирменнэй маҕаһыыннарга быдан чэпчэки буоларын өйдөөҥ.

Ынах этэ кэмчи, сыаната ботуччу. Ол оннугар сибиинньэ, куурусса этэ, балык баһаам. Үрдүк суортаах “тушенка” 196 солк. турарыттан харахпытын тиэрэ көрбүппүт. Хайыахпытый, хата, бэрт минньигэс миин астанан испиппит. 

Крымҥа айылҕата, килиимэтэ уратылаһар эбит. Холобур, Ялта ууга баран турар кэмигэр Евпаторияҕа хааппыла да ардах суох. Бу сааскыттан түспэтэх. Севастополь диэки барыта хайа, оттон Евпатория диэки – дэхси сир.

Үлэ миэстэтэ кырыымчык, онон  кыра да хамнаһы сирбэттэр. Ыйга 25-30 тыһыынча хамнас, тыый, үрдүк аатырар. Оскуола үөрэнээччилэрэ кыра саастарыттан үлэҕэ сысталларын, улахан дьону кытта тэбис-тэҥҥэ тиргиллэ сылдьалларын сэргии көрдүбүт. Аҕам саастаахтар биэнсийэлэригэр эбинэллэрэ – биллэр суол.

Куоскалаах куорат. Евпаторияҕа бэйдиэ сылдьар ыт, куоска элбэх. Анаан-минээн аһаталлар, ол иһин элбии тураллар. Чуолаан куоска хардыы аайы баар. 

Сонуннар

Ордук ааҕаллар

Педиатр Елена ИВАНОВА:  «Улаатар оҕоҕо — ураты болҕомто»
Дьон | 21.09.2021 | 12:00
Педиатр Елена ИВАНОВА: «Улаатар оҕоҕо — ураты болҕомто»
Бүгүн “Яннамед” медицинскэй клиника педиатр бырааһа Елена Владимировна Иванова ыалдьыттыыр. Кинини кытта оҕо доруобуйатын туһунан кэпсэтиибитин сэргээн ааҕыҥ.   Быраас анала – Кыра оҕо туга ыалдьарын сатаан кэпсээбэт, уопсайынан, кырачаан дьону кытта үлэлиир ыарахан. Педиатрияны тоҕо талбыккыный? Үлэҥ уратытын туһунан кэпсиигин? –  Мин оҕолору кытта үлэлиэм диэн эрдэттэн быһаарыммытым. Эдьиийим...
Дьокуускай куорат мин харахпынан
Куорат олоҕо | 12.09.2021 | 10:00
Дьокуускай куорат мин харахпынан
Сахабыт сирин килбэйэр киинэ, тапталлаах куораппыт 389 сааһын томточчу туоларынан барыгытын эҕэрдэлиибит. Биһиги ааҕааччыларбытыттан Дьокуускай куорат дьон олороругар туох үчүгэйдээҕин уонна мөкү өрүттэрдээҕин ыйыталастыбыт.   Маргарита, 29 саастаах, маҕаһыын атыыһыта: Куорат кытыытынааҕы оройуоннары тоҕо сайыннарбаккыт? Куорат киинигэр түргэнник кэлэр-барар уустук. Уопсастыбаннай тырааныспары  уларытыахха уонна сайыннарыахха наада. Биһиги ааспыт үйэ 70-с...
Тамара Верховцева: «Куһаҕаны, үчүгэйи барытын кэпсиибин»
Дьон | 14.09.2021 | 13:30
Тамара Верховцева: «Куһаҕаны, үчүгэйи барытын кэпсиибин»
Хаһыаппытыгар дөрүн-дөрүн ураты дьоҕурдаах, айдарыылаах дьону тиһигин быспакка сырдатабыт. Манна даҕатан эттэххэ, кинилэр бэйэлэрин талааннарын кэмэ кэллэҕинэ эрэ биирдэ кэпсииллэр. Бүгүҥҥү дьоруойбун кытта бу кыһын кэпсэтиэхтээх этибит да, кэмэ илик буолан, соннук хаалан хаалбыта. Тамара Прокопьевна Верхоцевалыын төлөпүөнүнэн сэһэргэстим. - Дорообо! Саха дьонун сиэринэн кэпсэтиибитин бэйэҕин билиһиннэрииттэн саҕалыахха... - Үөһээ...
Түргэн сокуускалар
Тускар туһан | 12.09.2021 | 09:00
Түргэн сокуускалар
Сорох бырааһынньыкка, араас фуршеттарга ол-бу канапелар, рулеттар, тарталеткалар “былааһы ылаллар”. Маннык түргэн сокуускалары киһи дьиэҕэ да астаныан сөп. Иһиккит көрүөх бэтэрээ өттүгэр кураанахтаммыта эрэ баар буолуо.   Лаваштан рулет Туох наадата: лаваш – 1 устуука, туустаах оҕурсу – 3 устуука, кытаанах сыыр – 75 г, сымыыт – 3 устуука, куурусса...