Кирилл Бычков Ыччат бырабыыталыстыбатын мунньаҕар кытынна

Быйыл регионнааҕы ыччат миниистирдэрин кэбиниэтэ иккис төгүлүн «Уһук Илиҥҥи федеральнай уокурукка бастыҥ Ыччат бырабыыталыстыбата» ааты ылары ситистэ, итиэннэ аан бастакы төгүлүн «Арассыыйа Федерациятыгар бастыҥ Ыччат бырабыыталыстыбата» үрдүк аакка тигистэ.

«Эһиги үлэҕитин уонна ситиһиилэргитин кэтээн көрөбүт, туруулаһан ылбыт үрдүк ааттаргыт – хамаандаҕыт уонна көхтөөх, айымньылаах ыччаккыт сыралаах үлэтин түмүгэ», – диэтэ Кирилл Бычков.

Мунньахха Ыччат бырабыыталыстыбатын 2023 сыллааҕы үлэтин барыллаан түмүктэрэ,  «Соискатели» уонна «Феникс» бырайыактар үлэҕэ киириилэрэ көрүлүннэ. Ыччат бырабыыталыстыбатын бэрэссэдээтэлэ Петр Бурнашев иһитиннэрбитинэн, 2021 сылтан саҕалаан 10-тан тахса социальнай хайысхалаах бырайыактар үлэҕэ киирдилэр, Ыччат бырабыыталыстыбатын чилиэннэрэ патриотическай иитиигэ, чөл олоҕу пропагандалааһыҥҥа, нэһилиэнньэ үпкэ сыһыаннаах билиитин хаҥатыыга уо.д.а. туһуламмыт тэрээһиннэргэ кытыннылар.

Премьер-миниистиргэ «Соискатель» уонна «Феникс» бырайыактары билиһиннэрдилэр. Бырайыактар чэрчилэринэн, орто уонна үрдүк үөрэх кыһатын бүтэрээччилэргэ өрөспүүбүлүкэ бөдөҥ тэрилтэлэригэр стажировка уонна  медицина үлэһиттэрин ортотугар идэттэн сылайыыны сэрэтэр үлэ тэрилллиэхтээх.

Кирилл Бычков бырайыактар дьоһун суолталаахтарын бэлиэтээтэ. Кини этэринэн, билигин өрөспүүбүлүкэ экономическэй баһылааһынын сайдыытыгар дьонугар тирэҕирэр. «Конструктивнай кэпсэтии түмүгүнэн, өрөспүүбүлүкэ көхтөөх ыччатын үлэтин-хамнаһын, сайдар кэскилин илэ харахпытынан көрдүбүт», – диэн бэлиэтээтэ бырабыыталыстыба бэрэссэдээтэлэ Кирилл Бычков.