Көрсүһүүлэр түмүктэринэн олохтоохтор санаалара барыта болҕомтоҕо ылыллар

Куорат баһылыга Евгений Григорьев СӨ Баһылыгын Укааһын бырайыагар киирбит киин куорат 2022-2032 сыллардааҕы социальнай-экономическэй сайдыытын стратегиятын дьүүллэһии чэрчитинэн бу күннэргэ Пединститутка Губинскай уокурук олохтоохторун кытта көрсүбүтэ.  
Нэһилиэнньэни кытта көрсүһүүгэ баһылыгы сэргэ солбуйааччылара, структурнай салаалар уонна муниципальнай тэрилтэлэр салайааччылара кыттар буолан, олохтоохтор араас эйгэҕэ сыһыаннаах кыһалҕалаах ыйытыктарыгар толору хоруйу ыллылар. 
Губинскай уокурук – элбэх нэһилиэнньэлээх уокуруктартан биирдэстэрэ, аҥардас 203 дьоҕус оройуоҥҥа 17000 киһи олорор. Манна үксэ элбэх кыбартыыралаах таас дьиэлэр бааллар. Баһылык алта мас хаарбах дьиэҕэ олорооччулар көһөрүү бырагырааматыгар киирбиттэрин туһунан эттэ. 
Евгений Григорьев иһитиннэрбитинэн, өрөспүүбүлүкэ бырабыыталыстыбата уонна куорат дьаһалтата бииргэ үлэлээһинин түмүгэр, киин куорат территориятыгар ыытыллыахтаах үлэ былаана бэлэмнэммит. Ол курдук, оҕо уонна спорт балаһааккалара, сылаас тохтобуллар, сырдатыы тирээбиллэрэ уо.о.д.а. куорат олоҕор тыын суолталаах эбийиэктэр оҥоһуллуохтаахтар. 2032 сылга Дьокуускай үрдүк таһымнаах олохтоох, бастыҥ куораттар кэккэлэригэр киириэхтээх. 
Баһылыгы кытта көрсүһүүгэ кэлбиттэртэн элбэх киһини  Кыайыы болуоссата саҥардыллан оҥоһуллара долгутара көһүннэ. «Эһигини кытта сөбүлэһэбин, саамай сөпкө ыйытаҕыт. Биһиэхэ муниципальнай үп суотугар Кыайыы паарката тутулла турар. Паарка түһүмэхтэринэн тутуллар, өрөспүүбүлүкэ автономиятын 100 сылыгар аһыллыахтаах. Барытын биирдэ оҥорор сатаммат. Бастакы уочарат Кыайыы болуоссатын өрөмүөнүнэн дьарыктаныахтаахпыт», − диэн хоруйдаата Евгений Григорьев.
Уокурук биир кыһалҕатынан арыгыны, итирдэр утахтары атыылыыр маркеттар, сымыйа кафелар буолаллар. Итинник эбийиэктэри оскуолалартан, оҕо уһуйааннарыттан, поликлиникалартан уонна балыыһалартан тэйиччи туруоруу уонна дьиэ таһынааҕы тиэргэн территорияларыгар итирдэр утахтары атыылыыры бобуу сотору кэминэн быһаарыллыахтаах. 
Олохтоохтор өссө биир туруорсар боппуруостара – 202-с уонна 203-с дьоҕус оройуоннар икки ардыларыгар баар Суорун Омоллоон уулуссатыгар тырааныспар наһаа түргэнник сылдьара буолар, ол иһин «сытар полицейскайдары» оҥорору туруорустулар. Маныаха 4 балаһалаах суолга итинник мэһэйи туруорар көҥүллэммэтэ,  ГИБДД өттүттэн суол быраабылатын кэһиини кэтиир камералар эрэ көмөлөһөр кыахтаахтара этилиннэ. 
Көрсүһүүгэ кэлбит дьон Губинскай уокурукка урукку курдук туспа поликлиниканы аһалларын туруорустулар. Медицинскэй киин филиалыгар специалистар уонна терапевтар тиийбэттэрэ, 202-с уонна 203-с дьоҕус оройуоннар олохтоохтор ыраах Кальвица уулуссаҕа турар 5 №-дээх поликлиникаҕа көрдөрүнэ бараллара этилиннэ. Онуоха Уокуруктааҕы дьаһалта бэрэстэбиитэллэрэ ити боппуруоһу быһаарарга үлэлэһиэх буоллулар. 
Билиҥҥи кэмҥэ ханна да буоларын курдук, дьону долгутар кыһалҕа – оҕо уһуйааннарыгар уонна оскуолаларга миэстэ тиийбэтэ. Төһө да дьоҕус оройуоҥҥа иккилии саҥа оскуола уонна оҕо уһуйаана аһыллыбытын иһин миэстэ син-биир тиийбэт эбит. Санатан эттэххэ, Дьокуускай куоракка 2032 сылга диэри 12 оскуола, ону сэргэ 5 оскуолаҕа уонна 19 оҕо уһуйааныгар самалык тутуллуохтаах. Ол төһө кыһалҕаны быһаарара билиҥҥитэ биллибэт. 
Балтараа чаастаах көрсүһүүгэ киирбит ыйытыктар бары толору хоруйу ыллылар.