Күндү Дьокуускай куорат олохтоохторо уонна ытык-мааны ыалдьыттара!

Эһигини Туймаада Ыһыаҕынан эҕэрдэлиибин! Бу кэм сайын кэлиитин, айгыр-силик айылҕа силигилээн ситиитин, киһи өй-санаа өттүнэн уһуктуутун кэрэһилиир. Тойук, алгыс, оһуокай, хомус нөҥүө Үрдүкү Айыыларга сүгүрүйэбит, кинилэртэн этэҥҥэ буолууну, өҥ сайыны, уйгуну-быйаҥы көрдөһөбүт.

Ыһыах саха норуотун, ону таһынан Саха сирин бары норуоттарын култууратын үйэтитэр, сайыннарар аналлаах. Бу сомоҕолоһуу, ил уонна эйэ бырааһынньыга.

Бэйэ изоляциятын кэмигэр уустук быһаарыныыны ылынным. Күүтүүлээх бырааһынньыкпытын онлайн форматынан ыытар буоллубут. Бу быһаарыныыны эһиги өйдүүргүт, өйүүргүт иһин махтанабын. Бэс ыйын 21 күнүгэр онлайн эрэсииминэн уонна тэлэбиисэринэн Үс Хатыҥ ытык сириттэн алгыһы көрүөхпүт. Бу иннинэ ыытыллыбыт ыһыахтары санаан ааһыахпыт.

Биллэн турар, аҕам саастаах дьон ыһыаҕы ордук кэтэһэр. Кинилэр, өбүгэлэрбит курдук, бу кэми күөххэ этэҥҥэ үктэниини кытта ситимнииллэр. Аҕа саастаах көлүөнэбит, 75-тэн үөһэ саастаах ытык дьоммут Аҕа дойду Улуу сэриитин оҕолоро буолаллар. Онон кинилэргэ бу күннэргэ өйдөбүнньүк бэлэхтэрбитин туттаран түмүктээн эрэбит.

Өссө төгүл барыгытын Олоҥхо ытык-мааны сиригэр самаан сайын эргиллибитинэн эҕэрдэлиибин! Үлэҕитигэр ситиһиилэри, дьиэ кэргэҥҥитигэр дьолу-соргуну баҕарабын. Өбүгэлэрбит үтүө үгэстэригэр ытык сыһыаммыт үүнүү-сайдыы төрдө буолуохтун!

 Дьокуускай куорат баһылыга Сардана Авксентьева