Инклюзивнай үөрэхтээһин нэдиэлэтэ ыытыллар

 «Харысхал» Аһымал пуондата 2022 сыл кулун тутар 17-23 күннэригэр «Инклюзивнай үөрэхтээһин нэдиэлэтэ» Бүтүн Арассыыйатааҕы хампаанньа чэрчитинэн үгэс буолбут кэккэ тэрээһиннэри ыытар. Сүрүн сыал – инклюзивнай үөрэхтээһини уонна инклюзияны уопсастыбаҕа сайыннарыы. Бу туһунан  «Харысхал» Аһымал пуондатын пресс-сулууспата иһитиннэрдэ. 
Инклюзия – доруобуйатынан хааччахтаах оҕону бөлөх, үөрэҕирии тэрилтэтин олоҕор толору киллэрии (-эрэд. бэлиэтээһинэ). 
Нэдиэлэ устата сирэй уонна кэтэхтэн (заочнай) форматтарынан инбэлиит дьон кыһалҕаларыгар уопсастыбаннас болҕомтотун тардар уонна кинилэргэ үтүө сыһыаны үөскэтэр сыаллаах кэккэ тэрээһиннэр ыытыллаллар. 
Инклюзивнай үөрэхтээһин Нэдиэлэтин чэрчитинэн ыытыллар тэрээһиннэр: Саха сирин оскуолаларыгар үтүө санаа Уруоктара, «Бииргэ үөрэнэбит» дистанционнай инклюзивнай олимпиада, Саха Өрөспүүбүлүкэтин Киин психолого-медико-педагогическай хамыыһыйатын уонна  ВОРДИ (Инбэлиит оҕолоох төрөппүттэр Бүтүн Арассыыйатааҕы тэриллиилэрэ) төрөппүттэргэ уонна педагогтарга аналлаах семинардара. Нэдиэлэ инклюзивнай үөрэхтээһини кытта сибээстээх исписэлиистэр уонна төрөппүттэр элбэх ыйытыктарыгар хоруйдуоҕа.  
«Харысхал» Аһымал пуондата Саха сирин бары педагогтарын уонна үөрэнээччилэрин инклюзивнай үөрэхтээһин Нэдиэлэтигэр кытталларыгар ыҥырар. Кыттыан баҕалаахтар сайаапкаларгытын inclusion.ykt@mail.ru электроннай почтаҕа ыытаҕыт. 
Сайаапкаҕа чопчу ыйаҕыт:
1. Тэрилтэҕит аатын;
2. Оскуолаҕытын, кылааскытын;
3. Кыттааччы (үөрэнээччи, учуутал) араспаанньатын, аатын, аҕатын аатын эбэтэр кыттааччы ахсаанын;
4. Электроннай почтаҕыт аадырыһын уонна билсэр төлөппүөн нүөмэрин.