Икки уокурукка тупсаран оҥоруу эбийиэктэрэ аһылыннылар

Саха өрөспүүбүлүкэтин судаарыстыбаннаһын Күнүгэр, Автодорожнай уокурук Көтөр фабрикатын дьоҕус оройуонугар саҥардыллыбыт тиэргэн территорията уонна Гагаринскай уокурук Курнатовскай уул., 3/5 спорт воркаут-балаһаакката аһылыннылар. Бу туһунан Уокуруктааҕы дьаһалта пресс-сулууспата иһитиннэрдэ.
Куорат баһылыга Евгений Григорьев, «Синет Развитие» ХЭТ генеральнай дириэктэрэ Александра Козулина, «Основа» ХЭТ генеральнай дириэктэрэ Юрий Попов Көтөр фабрикатын дьоҕус оройуонугар Автодорожнай уул., 40/7 №-гэр тупсарыллыбыт тиэргэн территориятын эбийиэктэрин аһыллыытыгар кыттыыны ыллылар. Оҕо балаһааккатын тутуутугар экологичнай матырыйааллар, мас туттуллубуттара этилиннэ. 
«Тиэргэннэр тупсарыллан оҥоһуллубуттара үөрүүлээх, оҕолор мичээрдэрин көрөр өссө үөрүүлээх. Бырагыраамабыт кэҥэтиллибитин иһин СӨ Баһылыга Айсен Николаевка туспа махталбын тиэрдиэхпин баҕарабын. Уон сыл иһигэр маннык 300 тиэргэн территориятын оҥорор былааннаахпыт», – диэтэ эҕэрдэ тылыгар Евгений Григорьев уонна Арсен Томскайга тус бэйэтигэр уонна «Индрайвер» социальнай өйөбүл уонна гражданнар көмүскэллэрин аһымал пуондатыгар махталын эттэ. 
«Биллэн турар, наһаа астынныбыт. Сайыны быһа наһаа элбэх оҕолор, бэйэм сиэннэрим, уолаттарым бу балаһааккаҕа оонньууллар», – диэн кэпсээтэ бу дьиэ олохтооҕо Яна Протопопова.
«Формирование современной городской среды» муниципальнай бырагыраама чэрчитинэн, СӨ Баһылыгын өйөбүлүнэн, 2021 сылга 15 тиэргэн территорията тупсаран оҥоһуллубут, онтон сороҕо  «Индрайвер» социальнай өйөбүл уонна гражданнар көмүскэллэрин аһымал пуондатын кытта бииргэ үлэлээһин түмүгэ.  Сакаасчык – «Главстрой» МХТ, электроннай аукцион түмүгүнэн үлэни толорооччу – «Основа» ХЭТ. 
Саҥа 15 воркаут-зонаттан биирдэстэрэ Гагаринскай уокурук Курнатовскай уул., 3/5 №-гэр аһылынна. Бу бырайыак «Формирование современной городской среды» муниципальнай бырагыраама чэрчитинэн физическэй култуураны уонна спорду, чөл олоҕу пропагандалыыр сыаллаах оҥоһуллубут. Балаһаакка бары ирдэнэр спортивнай тренажердарынан хааччыллыбыт, билигин уокурук олохтоохторо ыраас салгыҥҥа спордунан дьарыктанар кыахтаммыттар. 
Саҥа спорт балаһааккатын аһыллыытынан олохтоохтору куорат баһылыга Евгений Григорьев, Дьокуускай куораттааҕы Дума дьокутаата Саргылана Васильева, Гагаринскай уокурук салайааччыта Евгений Сидоренко, балаһаакканы туппут предприниматель Афанасий Ефремов эҕэрдэлээтилэр.
«Бырагыраама спорт куорат олохтоохторуттан биир хардыылаах сиргэ баар буоларыгар туһаайыллыбыт. Хомойуох иһин, куоракка төгүрүк сыл үлэлиир спорт эбийиэктэрэ аҕыйахтар, кинилэри тутуу бытаан.  Оттон воркаут-балаһааккалары сыл ахсын 15-тии устууканы оҥоруохпутун сөп. Биэс сыл иһигэр Дьокуускай куоракка 75 воркаут-балаһааккалары былаанныыбыт», – диэтэ  Евгений Григорьев.