Хоһоон суруйар кыргыттар

Олунньу 13 күнүгэр Ийэ тыл, сурук-бичик күнүн бэлиэтиибит. Бу күннэргэ үгүс тэрээһин ыытыллар.     

Дьокуускай куорат 12-с №-дээх оскуолатын 5 “В” кылааһын кыргыттара саха литературатын уруогар төрөөбүт тыл туһунан хоһоон суруйан холоннулар. Ону үөрэ-көтө таһаарабыт.

Махтанабын

Махтанабын

Төрөөбүт төрүт тылбар

Өбүгэм өйүн-санаатын

Бэлэх уунарыгар.

Махтанабын

Норуотум баай дууһатын

Сүрэхпэр иҥэрэн

Ийэ куппун уһугуннарарыгар.

Дайаана Елегяева

Сахам тыла

Төрөөбүт төрүт тылым,

Талыы-талба сахам тыла –

Тулалыыр мин эйгэм,

Тапталлаах мин дойдум.

Сахалыы сайаҕас саҥалыын

Самаан сайын, саамал кымыс,

Саламаат, салама, сандалы

Сир ийэбин симииллэр.

Сах саҕаттан кэлбит

Саргылаах сахабыт тылын

Сүрэххэ, дууһаҕа иҥэрэн

Сайдар саҕаҕы тобулуохха!

Сардаана Макарова

Төрөөбүт тылым

Төрөөбүт төрүт тылым

Бу тыынар салгыным курдук,

Иитиллибит ийэ тылым

Бу иһэр утаҕым курдук.

Саҥарар сахам тыла

Үөскээбит алааһым курдук,

Ылбаҕай ытык тылым

Хатыҥ чараҥым курдук.

Аяна Богдокумова