Хатаска элбэх оҕолоохтор кыбаарталларын суола оҥоһуллуоҕа

Ол уонна атын кыһалҕалаах боппуруостары быһаарыы туһунан куорат баһылыга Евгений Григорьев Хатас нэһилиэнньэтин иннигэр отчуотугар эттэ.

Евгений Григорьев 2023 сыл социальнай-экономическай көрдөрүүлэрин туһунан отчуотугар Дьокуускай куорат территоритыгар «Үөрэхтээһин», «Култуура», «Демография», «Олорор дьиэ уонна куорат эйгэтэ», «Куттала суох уонна хаачыстыбалаах суоллар» курдук биэс национальнай бырайыак, Тупсарыы үс сылын, Владимир Путин өйөбүлүн ылбыт куорат маастар-былаанын олоххо киллэрии туһунан кэпсээтэ.

Чуолаан Хатас бөһүөлэгэр ааспыт 2023 сылга П.Н. уонна Н.Е. Самсоновтар ааттарынан оскуолаҕа хапытаалынай өрөмүөн ыытыллыбытын, маны сэргэ салҕааһын тутуллубутун, быйыл спорт комплекса үлэҕэ киирээри турарын, 350 миэстэлээх Оҕо искусствотын дьиэтин бырайыага оҥоһулларын бэлиэтээтэ.

2024 сылга итини сэргэ элбэх оҕолоохтор кыбаарталларын суола оҥоһуллуоҕа.

Отчуот кэнниттэн олохтоохтор почта дьиэтин саҥардар, Озернай уулуссаҕа буор кутар, Озернай уонна Набережнай уулуссаларга уот тардар,  Каландаришвили уулуссатыттан протокаҕа диэри аспаал кутар наадатын, Кыайыы 50 сыла уулуссаҕа өрөмүөн ирдэнэрин, хомунаалынай төлөбүрдэр о.д.а. тыын кыһалҕаларын туруорустулар.