Ханнык чэпчэтиилээх ипотека бырагыраамалара баарый?

2024 сыл от ыйыттан олорор дьиэни атыылаһарга чэпчэтиилээх кирэдьиит усулуобуйатыгар уларыйыылар киирбиттэрэ. Холобура, бырабыыталыстыба сылга 8% ыстаапкалаах чэпчэтиилээх ипотеканы суох оҥордо. 
Онтон атын ханнык бырагыраамалар баалларый?

Дьиэ кэргэн ипотеката

Болдьоҕо: 2030 сыл ахсынньы 30 күнүгэр диэри уһатыллан турар

Усулуобуйата:

ыстаапката: 6% диэри

бастакы усунуос: 20% саҕаланар

кирэдьиит суумата: Москваттан, Санкт-Петербургтан атын регионнарга 6 мөл. солк. тиийэ

Кимнээх ылыахтарын сөбүй:

— Кирэдьиит дуогабарын түһэрсэр кэмҥэ ыал алта сааһын туола илик биир оҕолоох буолуохтаах;

— Ыал аччаабыта икки сокуоннай сааһын туола илик оҕолоох уонна 50 тыһ. диэри нэһилиэнньэлээх кыра эбэтэр тутуу ыытыллыытын таһыма намыһах куоракка дьиэ ылар буоллаҕына;

— Ыалга инбэлиит оҕо иитиллэр.

Хайдах дьиэни ылыахха сөбүй:

Дьиэ тутааччыттан (застройщик) атыылаһыы эбэтэр өлүү үбүнэн дьиэни тутууга кыттыһыы. Физическэй сирэйтэн атыылаһыы көрүллүбэт. Ол эрээри инбэлиит оҕолоох ыал элбэх кыбартыыралаах дьиэлэри туппат региоҥҥа «вторичка» дьиэни ылыан сөп.

IТ-ипотека

Болдьоҕо: 2030 сылга диэри.

Усулуобуйата:

Ыстаапка: 6% диэри

бастакы усунуос: 20% саҕаланар

кирэдьиит суумата: 9 мөл. солк. тиийэ

Хайдах дьиэни ылыахха сөбүй: IT-исписэлиистэр ипотеканы Москваттан уонна Санкт-Петербургтан ураты Арассыыйа хайа баҕарар регионугар тутулла турар, тутуллан бүппүт дьиэҕэ кыбартыыраны эбэтэр чааһынай дьиэни атыылаһарга ылыахтарын сөп. Застройщиктан атыылаһыахха, ону тэҥэ чааһынай дьиэ буолуон сөп.

Ирдэбиллэр:

18-50 саастаахтар

Хамнаһа – Москва уонна Ленинград уобалаһыттан ураты куораттарга регистрациялаах исписэлиистэр ыйдааҕы хамнастарын кээмэйэ 90 тыһ. солкуобайтан итэҕэһэ суох буолуохтаах.

IT-эйгэҕэ кирэдьиит ылыан иннинэ 3 ый үлэлээбит буоллаҕына.

Ипотеканы төлүүр кэмигэр бу эйгэҕэ үлэлиэхтээх.

Тыа сирин ипотеката

Ипотека усулуобуйата:

ыстаапка: 3% диэри

бастакы усунуос: 20% саҕаланар

кирэдьиит суумата: 6 мөл. солк. тиийэ

Тыа сиригэр, 30 тыһыынчаттан элбэҕэ суох нэһилиэнньэлээх куораттарга дьиэ туттарга аналлаах бырагыраама.

Хайдах дьиэни ылыахха сөбүй:

Застройщиктан бэлэм эбэтэр тутулла турар дьиэни;

Юридическэй сирэйтэн эбэтэр урбаанньыттан - үс, физическэй сирэйтэн биэс сылтан бэттэх учаастактаах дьиэни;

Атын дьиэни кытта холбуу тутуллубут дьиэ (холобур, икки дьиэ уопсай истиэнэлээх буоллахтарына);

Тутулла турар дьиэҕэ кыбартыыралары застройщиктан эбэтэр бастакы хаһаайынтан (дьиэ 5-тэн үрдүк этээстээх буолуо суохтаах).

*Бэйэ күүһүнэн 24 ый иһигэр туттуохха наада

Арктическай уонна Уһук Илиҥҥи ипотекалар

Болдьоҕо: 2030 сылга диэри

Усулуобуйалара:

Ыстаапката: 2% диэри

Бастакы усунуос: 20% саҕаланар

Кирэдьиит суумата: 6 мөл. солк. тиийэ (тутуллар/атыылаһар дьиэ иэнэ 60 кв.м. улахан буоллаҕына, 9 мөл. солк. диэри)

Кимнээх ылыахтарын сөбүй:

Кэргэнниилэр иккиэн 36 саастарын туола иликтэр;

36-гар диэри саастаах аҥаардас төрөппүт (оҕо 18 сааһын туола илик буолуохтаах);

Оборуона-промышленнай комплекс үлэһитэ;

Уһук Илин регионугар эбэтэр Арктикаҕа кырата 5 сыл үлэлээбит доруобуйа харыстабылын уонна үөрэх эйгэтин үлэһиттэрэ;

Украинаттан, ДНР уонна ЛНР өрөспүүбүлүкэлэриттэн көһөн кэлбиттэр, анал байыаннай дьайыы кыттыылаахтара уонна өлбүт буойуннар дьиэ кэргэттэрэ;

“Уһук Илиҥҥи эбэтэр Арктическай гектар” бырагыраама кыттыылаахтара;

Уһук Илиҥҥэ эбэтэр Арктикаҕа үлэҕэ ананан кэлбит исписэлиистэр.

* Уһук Илин уонна Арктика ипотекатын сүрүн уратыта – 240 ый болдьохтоох.

Хайдах дьиэни ылыахха сөбүй: тутулла турар уонна бэлэм дьиэлэри Уһук Илин федеральнай уокуругар ханнык баҕарар куоракка атыылаһыахха/туттуохха сөп.

Байыаннай ипотека

Бу өйөбүл миэрэтин Оборуона министиэристибэтин кытта дуогабар түһэрсибит контрактниктар туһаналлар. Ол эбэтэр сулууспалыыр кэмнэригэр судаарыстыба ипотекаларын төлүүр. Кирэдьиит ылар киһи бырагыраама усулуобуйатын барытын толорор буоллаҕына, ол кыбартыыра кини бас билиитигэр хаалар. Сулууспалаах киһи усулуобуйаны толорботоҕуна  (холобур, эрдэ уурайар), бүддьүөттэн ороскуоттаммыт үбү уонна кирэдьиити бэйэтэ төлүүр.

Харчы уонна кыбартыыра байыаннай киһи бас билиитигэр киирэригэр, бу усулуобуйалартан биирдэстэрин толоруохтаах:

20 уонна онтон элбэх сыл сулууспалаабыт

10 сыл үлэлээн баран аахсыллар биричиинэлэринэн үлэттэн уурайбыт

Хайдах дьиэни ылыахха сөбүй: ырыынак ыстаапкатынан ханнык баҕарар дьиэни, ханнык баҕарар куоракка, нэһилиэккэ

Хаартыска: freepik.com

(Сиһилии: «МоиФинансы» саайт, Мария Иваткина)