10.04.2022 | 10:00

Ханнык аптекаҕа туох чэпчэтии баарый?

Ханнык аптекаҕа туох чэпчэтии баарый?
Ааптар: Айыына Ксенофонтова

Билиҥҥи ырыынак үйэтигэр ыалдьар ночооттоох. Эмп сыаната күн-түүн үрдүү турар. Эбиитин санкция биллэрилиннэ. Онон быыкааны да буоллар, төһөнү эмэ барыһырбыт киһи дии саныыгын. Ордук нэһилиэнньэ кыаммат араҥата хас биирдии солкуобайын ааҕар.

Бүгүҥҥү нүөмэрбитигэр Дьокуускай куорат аптекаларыгар ханна, туох чэпчэтии көрүллэрин үөрэттибит. Онуоха 2ГИС каартанан сирдэтиннибит, сайтары, социальнай ситимнэри хастыбыт. Сорох сиргэ эрийэн ыйыталастыбыт. 

Бу реклама буолбатах. Ааҕааччыларбыт туһанныннар диэн бэлэмнээтибит. Ууруна сылдьан ыйынньык оҥостуҥ! Чэгиэн буолуҥ, этэҥҥэ сылдьыҥ!

 

«Аптека миницен»

Дьокуускай куоракка алта филиаллаах. Бэйэ уопутуттан ылан көрдөххө, сыаналара уратылаһар. Онон барыһырар туһугар ханна арыый чэпчэкитин үөрэтэр буол.

minicen.ru сайт эбэтэр мобильнай сыһыарыы нөҥүө сакаастыыр буоллаххына, 10%-ҥа тиийэ чэпчэтии көрүллэр. Сайтка тус кабинет арыйаҕын, наадыйар эмкин, табааргын талан сакаастыыгын. Бэлэм буоллаҕына, СМС кэлэр. Онно баар коду кассаҕа тиийэн этэҕин. Дьиэҕиттэн чугас аптека аадырыһын суруйарыҥ ордук. Интэриниэтинэн сакаастаабыттар уонна уочараттаан атыылаһааччылар туспа толуон ылаллар. Уурдарбыт эмиҥ 1 суукка сытар.  Бонускун мунньан, кэлин туһаныаххын сөп.

 

«Аптека №1»

Төлөпүөн нүөмэринэн бонуснай каарта оҥоһуллар, онно атыыласпыт суумаҕыттан бырыһыан мунньуллан иһэр. 

5%-наах чэпчэтии көрүллэр:

- биэнсийэлээхтэргэ;

- инбэлииттэргэ;

- элбэх оҕолоох ыалларга.

 

«Маяк»

Дьокуускай куоракка үс филиаллаах. Онтон биирэ суукканы эргиччи үлэлиир.

10%-наах чэпчэтии көрүллэр:

- 60-тан үөһэ саастаах биэнсийэлээхтэргэ;

- 1-кы, 2-с группалаах инбэлииттэргэ;

- элбэх оҕолоох ыалларга.

 

«Аптека.ру»

54 филиаллаах. Дьиэҕиттэн чугас аптеканы сайтка киирэн көрүөххүн сөп.

Apteka.ru – эми-тому, доруобуйаҕа аналлаах табаары сакаастыырга анал сервис. Регистрацияланар судургу. Сайтка араас аахсыйалары, чэпчэтиилэри биллэрэллэр. Ону кэтии сылдьан туһаныахха сөп.

 

«Аптеки Якутска»

23 филиаллаах. Рекламаларыгар “биһиги аптекаларбытыгар аҥаардас эмп-том буолбакка, ачыкы арааһа, ачыкы иитэ эмиэ атыыланар. Бэлэми талан ылыахха эбэтэр сакаастыахха сөп” диэн суруллубут.

Ленин уул. баар филиалга эрийэ сырыттым. “Чэпчэтии көрүллүбэт, бонуснай систиэмэнэн үлэлиибит. 500 солкуобайтан элбэх суумаҕа атыылаһар түгэҥҥитигэр, дьиэҕэ тиэрдэн биэрии өҥөтө баар. Куорат киинигэр – 100 солк. эбии төлүүгүт. Атын оройуоннарга – төһө ырааҕыттан көрөн”, – диэн кэпсээтэ справочнай үлэһитэ.

«ТвояАптека.рф»

14 филиаллаах (партнер аптекалаах). Дьиэҕиттэн чугас турар аптекаттан уочарата суох тиийэн ылаҕын.

Онлайн сервис нөҥүө удамыр сыанаҕа атыылаһыахха сөп. tvoyaapteka.ru сайтка киирэн, тус кабинет арыйаҕын, наадыйар эмкин, табааргын талан сакаастыыгын. Бэлэм буоллаҕына, СМС кэлэр.  Онно баар коду кассаҕа тиийэн этэҕин. Уурдарбыт табаарыҥ биир суукка сытар.

Сайтка араас аахсыйалары биллэрэллэр, көрө сылдьан туһаныахха сөп.

 

«Рослек»

27 филиаллаах. Бонуснай бырагырааманан туһаныахха сөп. Атыыласпыт суумаҕыттан 10%-ҥа тиийэ бонус мунньуллар.

7%-наах социальнай чэпчэтии көрүллэр:

- биэнсийэлээхтэргэ;

- 1-кы, 2-с группалаах инбэлииттэргэ;

- элбэх оҕолоох ыалларга;

- Аҕа дойду Улуу сэриитин уонна тыыл бэтэрээннэригэр.

Аахсыйалары, анал этиилэри roslek.ru сайтка киирэн көрүөххүн сөп.

 

«Аптека Рядом»

4 филиаллаах. www.aptekarm.ru сайт нөҥүө сакаастаатаххына, 5% чэпчэтии көрүллэр.

Нэһилиэнньэ кыаммат араҥата 10% чэпчэтиинэн туһаныан сөп. Атыыласпыт суумаҕыттан 2% бонус быһыытынан мунньуллан иһэр. Табаар сыанатыттан 30% бонускунан төлүүр кыах баар.

 

«Зеленая»

6 филиаллаах. Икки аптекаҕа эрийэ сырыттым. Бастакы сырыыга ылбатылар. Иккис сирбэр: “Биэнсийэлээхтэргэ 5% чэпчэтии баар уонна суох”, – диэн хоруйдаатылар.

“Вконтакте” киирэн көрдүм, онно төрөөбүт күннээхтэргэ 10% чэпчэтии көрүллэр диэн суруллубут. Бэлиэ күҥҥэ ыалдьа сыппатах киһи, бары этэҥҥэ буолуохха!

 

«Сахафармация»

19 филиаллаах. sfrm.ru сайтка суруллубутунан, араас аахсыйалары биллэрэллэр. Холобур, “Дьоллоох чаастар” диэн баар. Ол бэнидиэнньиктэн бээтинсэҕэ диэри сарсыарда 10 чааска диэри эбэтэр киэһэ 18 чаас кэннэ. Субуотаҕа, баскыһыанньаҕа күнү быһа. Аны туран, анал бырагыраама кыттыылаахтарыгар икки бүк бонус эбиллэр. Өссө сорох табаардарга аахсыйа биллэриллэр.

Биир филиалга эрийэ сырыттым. Өрөбүл күннэргэ биэнсийэлээхтэргэ 10% чэпчэтии көрүллэр диэтилэр.

 

«Твоя аптека»

yakutsk.asna.ru сайтка суруллубутунан, араас аахсыйа баар. Холобур, сайт нөҥүө сакаастаатаххына, күөх өҥнөөх сыаналаах табаардарга чэпчэтии көрүллэр. 3000 солк. элбэх суумаҕа атыылаһар буоллаххына, ордук барыһыраҕын.

2ГИС-ка биэнсийэлээхтэргэ уонна инбэлииттэргэ 5% чэпчэтии көрүллэр диэбиттэр.

Бонус – сүрүн барыс

1. Аптека үксэ элбэх филиаллаах. Онон сайт эбэтэр мобильнай сыһыарыы нөҥүө сакаастыыр буоллаххына, дьиэҕиттэн (үлэҕиттэн) чугас аптеканы таларыҥ ордук. Бириэмэҕин айаҥҥа бараабаккын.

 

2. Сорох аптекалар партнердаахтар. Онно табаардара сайтарыгар ыйыллыбыт сыананан атыыланар.

 

3. Онлайн сервиһинэн сатыыр эрэ дьон туһаналлар диэн сыыһа өйдөбүл. “Ээ, пахай, эдэрдэргэ барсар эбит”, – диэн сапсыйан кэбиһимэ. Сайтка регистрацияны ааһар судургу. Аҕыйах мүнүүтэни барыыгын, ол оннугар бонуһунан туһанар кыахтанаҕын.

 

4. Сайт (мобильнай сыһыарыы) үксүн төлөпүөҥҥүн уонна ааккын эрэ ыйытар. Сорох бөдөҥ аптека сайта (холобур, Арассыыйа атын регионнарыгар эмиэ филиаллардаах буоллаҕына) ханнык нэһилиэнньэлээх пууҥҥа олороргун сураһар. Бүттэ. Туох да уустуга суох.

 

5. Уопсайынан, үгүс аптека “ким бонустаах – ол барыһырар” диэн бириинсибинэн үлэлиир диэн түмүккэ кэллим. Онон мэлдьи биир аптекаттан ылар үчүгэй буолан тахсар. Оччоҕуна бонуһуҥ мунньуллар.

 

6. Сорохтор рекламаларынан бэркэ угуйаллар эбит. Бэл диэтэр, “парковкабыт табыгастаах” диэн суруйалларын сэргии аахтым.

 

7. Сорох аптекалар пандустаахтар. Кырдьык даҕаны, доруобуйаларыгар хааччахтаах, аҕам саастаах дьон киирэллэригэр-тахсалларыгар ыарырҕаталлара чуолкай. Кинилэргэ табыгастаах.

Сонуннар

Ордук ааҕаллар

Ырыанан аата тилиннэ
Дьон | 05.05.2022 | 11:00
Ырыанан аата тилиннэ
Ааспыт үйэ 60-70 сыллара... Эдэркээн киһи бэйэтин хоһооҥҥо холонор... Тыа сирин муҥкук, сэмэй уола оччотооҕуга хантан билиэ, сэрэйиэ баарай, инники олоҕун оҥкулун...   Олох диэн дьикти. Өлбүт да кэннэ иккистээн тиллэр, олох олорор диэн баар буолар эбит. Кини орто дойду олоҕуттан арахсыбыта быданнаабытын кэннэ... ол хоһооннорун нөҥүө тилиннэ, бэйэтэ суруйан хаалларбытыныы,...
«Күөх Ньурба»: айылҕа эмтиир күүһүн туһанан
Дьон | 06.05.2022 | 15:00
«Күөх Ньурба»: айылҕа эмтиир күүһүн туһанан
Дьоҥҥо-сэргэҕэ үтүөнү оҥорор баҕа санааны олоххо киллэрэн, Ийэ айылҕабыт биэрэр сүдү күүһүн таба туһаныахха, онно эбии билиини-көрүүнү, сатабылы дьүөрэлээн, бизнес эйгэтигэр бэйэ суолун-ииһин булуохха сөп. Бүгүҥҥү дьоруойдарбыт тустарынан аҕыйах тылынан билиһиннэрдэххэ, итинник.      Дмитрий, Дайаана Саввиновтар 2013 сылтан дьиэ кэргэнинэн ыҥырыа иитиитинэн дьарыктаналлар. Бастаан ыал ийэтин дойдутугар – Сунтаарга үлэлээн саҕалаабыттар....
Бэртээхэй да идэ — бэтэринээр
Сонуннар | 04.05.2022 | 16:24
Бэртээхэй да идэ — бэтэринээр
Муус устар 30 күнүгэр Бэтэринээр күнэ буолан ааста.  Бу идэ биһиэхэ, сүөһүлээх-сылгылаах сахаларга, олус чугас. Биһиги Хатаспатыгар былыр-былыргыттан бэтэринээрдэр баар буоланнар, устуоруйаҕа киирбит аймалҕаннаах, элбэх сүтүктээх бруцеллез, сэллик курдук сыстыганнаах ыарыылар суох буолбуттара. Ама да ааспытын иһин, улахан хоромньуну таһаарбыт ыарыыны суох гынаары, саҥа атахха туран кэҥээн-тэнийэн эрэр хаһаайыстыбалары эһэн,...