Евгений Григорьев тупсаран оҥоруу бырайыагар көннөрүүлэри киллэрдэ

Куорат баһылыга Евгений Григорьевы кытта көрсүһүүгэ Кузьмин уулуссатын 34 уонна 34/1 дьиэлэрин олохтоохторо оҕо балаһааккатын оннугар парковканы, воркаут оннугар баскетбол балаһааккатын, итиэннэ бөх кутар контейнердар балаһааккаларын оҥорор туһунан этиилэри киллэрдилэр. Бу туһунан Олохтоох дьаһалта пресс-сулууспата иһитиннэрдэ.
Ыам ыйын 23 күнүгэр куорат баһылыга «1000 тиэргэн» Уһук Илиҥҥи бырагыраама олоххо киириитин чэрчитинэн Гагаринскай уокурук олохтоохторун кытта көрүстэ.
Куорат олохтоохторун көрдөһүүлэринэн тиэргэн территориятын тупсаран оҥоруу бырайыага уларыйыан сөп. Ол курдук, Кузьмин уулуссатын 34 уонна 34/1 дьиэлэригэр үс туспа балаһаакка оннугар икки зона баар буолуоҕа – 1 саастарыттан 13 саастарыгар диэри оҕо балаһаакката уонна баскетбол балаһаакката. Итини таһынан, олохтоохтор көрдөһүүлэринэн, парковка миэстэтэ икки төгүл элбиэҕэ. 
Кузьмин уулуссатын 29, 29/1, 29/2 дьиэлэрин олохтоохторо баһылыктан Можайскай уулуссатыгар диэри айан суолун аспааллааһыҥҥа уларытыы киллэрэри, Севастопольскай уулуссатыгар тахсар, билигин сабыллан турар суолу арыйары, итиэннэ иккис парковка оннугар сатыы дьон сылдьар тротуарын оҥорору көрдөстүлэр. 
Гражданнар баһылыкка ууну ыытыыга, сырдатыы тирээбиллэрин оҥорууга сыһыаннаах ыйытыктары биэрдилэр.
«Ростройпроект» ХЭТ бырайыактыыр тэрилтэ бэрэстэбиитэлэ бырайыак быһыытынан уулусса сырдатыытын саҥардыы көрүллэрин туһунан иһитиннэрдэ. 
Көһө сылдьар мунньахха «Кинг-95» бэдэрээтчит тэрилтэтин, «Гагаринскай», «Арсенал», «Комфорт Сити» салайар хампаанньалар, Гагаринскай уокурук Управатын, Куораты тутууга уонна тырааныспар инфраструктуратыгар департамент, «Главстрой» МХТ бэрэстэбиитэллэрэ кытыннылар.
Бэлиэтээн эттэххэ, «Уһук Илиҥҥэ 1000 тиэргэн территорията» бырайыак чэрчитинэн, Дьокуускай куоракка 75 тиэргэн тупсаран оҥоһуллуоҕа.