Евгений Григорьев Салайар хампаанньалары уонна ТСЖлары кытта туспа мунньахтыыр буолуоҕа

Тохсунньу 26 күнүгэр буолан ааспыт көрсүһүүгэ Евгений Григорьев ааспыт 2022 сылга 75 тиэргэҥҥэ тупсарыы үлэтин иитинэн 100 тыһ. кв. иэннээх асфальт ууруллубутун бэлиэтээн туран, оҥоһуллубут үлэни көрүү-истии Салайар хампаанньалар уонна ТСЖлар эппиэтинэстэригэр киирэрин, ол эрээри бэдэрээтчиттэр кэлэр 5 сылга итэҕэһи-быһаҕаһы көннөрөр эбээһинэстээхтэрин санатта. Маны сэргэ ханнык даҕаны элбэх кыбартыыралаах дьиэ тиэргэнигэр хаһаайына биллибэт спортивнай, оҕо балаһааккалара, бөҕү тоҕор сирдэр суох буолуохтаахтарын ыйда. 
Бэлиэтээн эттэххэ, тиэргэни тупсарыы бырайыага 2032 сылга диэри салҕанар. Оттон куорат бүддьүөтэ бастакы уочарат үчүгэй үлэлээх Салайар хампаанньалар уонна ТСЖлар тиэргэннэрин оҥорууну үбүлүүр буолуоҕа. 
Тиэргэни, олорор сири тупсарыы үлэтигэр сайыҥҥы көҕөрдүү үлэтэ киирэр. Баһылык «Киин куорат күөх кубога» күрэххэ кыттыбыт Салайар хампаанньаларга уонна ТСЖларга махталын биллэрдэ. Бу күрэх иитинэн 2022 сылга киин куоракка 1,5 мөлүйүөн сибэкки уонна 10 тыһыынчаттан тахса мас олордуллубут.
Тиэргэннэр биир кыһалҕалара – бөх тоҕор сир. Баһылык бөҕү наардааһыны өйүүр наадалааҕын ыйда. 2022 сылга куоракка уопсайа бөҕү наардаан тоҕор 45 пуун тэриллибит.
Көрсүһүү кыттыылаахтара куорат дьаһалтатын болҕомтотун чааһынай секторга саахал тахсар түгэнигэр саппаас источниктар наадаларыгар, нэһилиэнньэ хомунаалынай өҥөҕө элбэх иэстээҕигэр хатаата. Губинскай уокурук олохтооҕо Салайар хампаанньата мөлтөхтүк үлэлиирин, олохтоохтору кытта көрсүһүүттэн куотунарын эттэ.
Чкалов уул., 11 дьиэтин Салайар хампаанньатын бэрэстэбиитэлэ саҥа тутуу ааттаах дьиэ тиэргэнигэр уу сүүрэр систиэмэ суоҕунан бу кыһалҕаны «Водоканал» АУо кытта быһаарарга көрдөстө. 
Мунньах түмүгүнэн Евгений Григорьев Салайар хампаанньалары уонна ТСЖлары кытта сүбэ мунньахтары ыытар тоҕоостооҕун ыйан туран, «СЭХГ» МКУ былаан оҥорорго сорудахтаата. Маҥнайгы мунньах бэбиэскэтигэр тохсунньу 26 күнүнээҕи көрсүһүүгэ турбут боппуруостар киириэхтэрэ.