Евгений Григорьев предпринимателлэри кытта көрүстэ

Куорат баһылыга Евгений Григорьев уонна баһылыгы экэниэмикэҕэ уонна үпкэ солбуйааччы Георгий Гаврильев атыы-эргиэн ситимнэрин, кууһунан атыылыыр хампаанньалар, дистрибьютордар бэрэстэбиитэллэрин кытта Дьокуускай маҕаһыыннарыгар табаары аҕалыы боппуруостарынан көрүстүлэр. Бу туһунан Олохтоох дьаһалта пресс-сулууспата иһитиннэрдэ.
Куорат баһылыга иһитиннэрбитинэн, Саха Өрөспүүбүлүкэтин Бырабыыталыстыбатын кытта предпринимателлэри өйүүр миэрэлэргэ үлэлэһэллэр. Олохтоох дьаһалта өттүттэн биир итинник миэрэнэн 5% ставкалаах заемнары биэрэр «Дьокуускай куорат сайдыытын пуондата» микрокредитнай хампаанньа үпкэ резервэтин үрдэтии буолар. 
Предпринимателлэр сыананан спекуляциялыыр сатамматын эттилэр, ол эрэн табаары атыылаһыы эйгэтигэр төлөбүргэ, тырааныспар-логистическай ситимигэр уларыйыылар киирбиттэрин бэлиэтээтилэр. Холобур, ыҥырыллыбыт предпринимателлэр бары оҥорон таһаарааччылар маркетинговай хардыылары – барыстаах чэпчэтиилэри, промо-аахсыйалары суох гыммыттарын туһунан эттилэр. Итини таһынан, бааҥҥа бизнеһы кредиттааһын ставкалара үрдээбиттэр. 
Предпринимателлэр куорат уонна өрөспүүбүлүкэ былаастарын контейнер тиийбэтигэр болҕомтолорун ууралларыгар уонна логистикаҕа көрсөр кыһалҕаларыгар көмөлөһөллөрүгэр көрдөстүлэр. 
Евгений Григорьев бизнес бэрэстэбиитэллэрин табаары аҕалыы харгыһа суох буоларын курдук күүстэрин түмэллэригэр уонна аһылыкка, тыын суолталаах табаардарга сыананы олоҕо суох үрдэтэллэрин туһунан биллэрэллэригэр ыҥырда. 
«Маннык көрсүһүүлэри Дьокуускайга дьоҕус уонна орто бизнеһи өйүүр курдук тиһиктээхтик ыытар былааннаахпыт», - диэн тоһоҕолоон бэлиэтээтэ куорат баһылыга.
Предпринимателлэри кытта таһаарыылаах кэпсэтии сотору кэминэн салҕаныахтаах.