Евгений Григорьев Марха баанньыгын уларытан оҥорууну бэрэбиэркэлээтэ
Бырайыагы олоххо киллэрээччи – чааһынай тэрилтэ, «Бизнес инфо» ХЭТ, үлэни бэйэтин суотугар ыытар. Үбүлээһин уопсай суумата – 133 мөлүйүөн солкуобайтан тахса.
«Бизнес инфо» ХЭТ дириэктэрэ Петр Федоров иһитиннэрбитинэн, икки этээстээх эбийиэк иэнэ 2 тыһыынча кв. миэтэрэттэн тахса, 32 үлэ миэстэлээх. Баанньык 100 киһиэхэ оросчуоттаммыт, итинтэн 60-на эр дьон саалатыгар, 40-на – дьахталларга ананар.
Билиҥҥи туругунан тутар-таҥар үлэ сүнньүнэн түмүктэннэ, наадалаах тэрил барыта баар буолла. Тутуу бэлэмэ – 98%.
Эбийиэги уунан хааччыйыы туһунан этэр буоллахха, «Водоканал» АУо уу холуодьаһын туруорда, «Бизнес инфо» ХЭТ уу киирэр ситимин бырайыагын оҥордо. Билигин докумуоннары толоруу үлэтэ барар.
Марха дьоҕус оройуонун дьаһалтатын баһылыга Николай Ксенофонтов этэринэн, олохтоохтор уопсастыбаннай баанньык аһылларын олус күүтэллэр.
Евгений Григорьев саҥа баанньыкка Марха олохтоохторо эрэ буолбакка, куорат атын оройуоннарыттан эмиэ сылдьыахтара диэн эрэлин биллэрдэ. Гражданнар сорох араҥаларыгар чэпчэтиилээх төлөбүр олохтонуоҕа.
Манна даҕатан эттэххэ, 2020 сыл атырдьах ыйын 5 күнүгэр Олохтоох дьаһалта уонна «Бизнес инфо» ХЭТ 03 №-дээх концессионнай сөбүлэҥи түһэрсибиттэрэ. Итиннэ олоҕуран, тэрилтэ «Факел» атыы-эргиэн киинин уларыта тутан уопсастыбаннай баанньык оҥоруохтааҕа.
Быһа холоон саҥа баанньык бу сыл сэтинньи ыйыгар үлэҕэ киирэрэ күүтүллэр.
Сонуннар
Ордук ааҕаллар
