Евгений Григорьев АГАТУ кэлэктиибин кытта көрүстэ

Баһылык ирбэт тоҥ үрдүгэр Дьокуускайы бастыҥ куоратынан оҥоруохтаах стратегическай докумуон сүрүн хайысхаларын туһунан кэпсээтэ. Докумуоҥҥа олоҕуран 2032 сылга диэри араас эйгэҕэ, ол иһигэр тыа хаһаайыстыбатыгар, IT, үөрэҕириигэ, наукаҕа, промышленнаска, туризмҥа, тырааныспар-логистика ситимигэр уонна онтон да атын хайысхаларга балысхан сайдыы барыахтааҕа былааннанар.

Былаан сүҥкэн суолталаах бырайыактары олоххо киллэрэргэ туһуланар – Өлүөнэ өрүһү туоруур муоста, Үүнэр көлүөнэ паарката, саҥа креативнай киин, үөрэх кыһаларын кампустара уо.д.а. Улахан болҕомто туризм сайдыытыгар, тупсаран оҥорууга, территориялар биир кэлим сайдыыларыгар ууруллар.

«Маастар-былаан соруга чопчу уонна арылхай. Докумуону нэһилиэнньэни кытта көхтөөхтүк дьүүллэһэбит, олохтоохторго, үүнэр көлүөнэҕэ табыгастаах буолуута – үлэбит сүрүн соруга», - диэн бэлиэтиир куорат баһылыга.

АГАТУ агротехнологическай факультетын «Уопсай изотехния» кафедратын доцена Акулина Попова кэпсээбитинэн, кини киин куоракка 1981 сылтан олорор уонна Дьокуускай сайдыытын туһугар сүрэҕинэн-быарынан кыһаллар.

«Евгений Николаевич инники былаан туһунан сиһилии кэпсээтэ. Итинник улахан уларыйыылар буолуохтаахтарын истэн үөрдүбүт. Устудьуоннар кампустарын сайдыыта былааннанара устудьуоннарга уонна преподавателлэргэ улахан бэлэҕинэн буолар. Урут биһиги кытыы сиринэн ааҕыллар эбит буоллахпытына, билигин Олонхоленд тутуллуутунан сибээстээн креативнай киин буолууһубут», - диэн кини санаатын үллэһиннэ.

«Ордук суол тутуутун уонна өрөмүөнүн туһунан былааннары сөбүлүү иһиттим. Куоракка чахчы сөҕүмэр элбэх суол, ол иһигэр бэлисипиэттээх уонна сатыы дьоҥҥо анаан тутуллар. Холобур, университеппыт таһыгар сатыы дьон сылдьар зоната оҥоһуллар. Суолу кэҥэтэннэр харгыһа суох айанныыр, үөрэхпитигэр түргэнник тиийэр кыахтанныбыт. Маастар-былааҥҥа олоҕуран куорат бүтүннүү итинник буолуоҕа», - диир АГАТУ устудьуона Ильдар Слепцов.