Эргиэн эйгэтэ статистика хараҕынан

2013 сылтан Арассыыйаҕа от ыйын төрдүс субуотатыгар эргиэн үлэһитин күнэ бэлиэтэнэр. Бырааһынньык бастаан ааспыт үйэ 1966 сылыгар ССРС Үрдүкү Сэбиэтин Президиумун ыйааҕынан олохтоммута уонна бэлиэтэнэр күнэ үс төгүл уларыйбыта. 
Росстат чахчытынан, 2024 сыл тохсунньу 1 күнүнээҕи туругунан Саха Өрөспүүбүлүкэтигэр эргиэн эйгэтигэр 2199 юридическай сирэй, 8873 урбаанньыт баара. Эргиэн тэрилтэлэригэр ортотунан 12353 киһи үлэлиир, онтон 65,4% – розничнай атыы эйгэтигэр.
Бытархай атыы (розница) иэнэ 2023 сылга 353,7 млрд солк. тэҥнэспит, ол иһигэр: 167,2 млрд солк. – аһылык бородууксуйата, утахтар, табах; 186,5 млрд солк. – аһылыктан атын табаар. Бытархай атыы 46,8% биирдиилээн урбаанньыттарга тиксэр, 26,4% – дьоҕус урбааҥҥа киирсибэт тэрилтэлэргэ, 23,9% – дьоҕус уонна онтон кыра тэрилтэлэр; маны сэргэ 3,0% – бытархай табаарынан эргинэр ырыынактар уонна дьаарбаҥкалар оҥорор иэннэрэ.
Кэлиҥҥи кэмҥэ интэриниэт нөҥүө атыы күүскэ сайынна. Ол курдук, өскөтүн 2022 сылга Саха сиригэр бу хайысха атыы 2,3% ылбыт буоллаҕына, 2023 сылга ити кээмэй икки төгүл улааппыт – 4,4%, оттон Арассыыйа үрдүнэн 8,1% тэҥнэспит (2022 сылга – 6,0%), диэн иһитиннэрэр Сахастат пресс-сулууспата.