Эрдэттэн бэлэмнэммиттэр кыайдылар

Киин куоракка “Саха дьахталлара – дойду ис туругун эрэллэрэ” (“Якутянки – надежный тыл страны”) девизтээх Саха сирин дьахталларын VIII-с спартакиадатыгар 23 улуус, оройуон хамаандаларыттан 572 кыттааччы түмсэн икки күн спорт 9 көрүҥэр күрэхтэстилэр.

Спартакиада үөрүүлээхтик сабыллыыта “Кыайыы 50 сыла” Спорт дыбарыаһыгар буолла. Улуустарын сүүмэрдэммит хамаандатын былаахтарын күөрэччи туппут, суруктаах-бичиктээх, дьэрэкээн таҥастаах эрчимнээхтик сэлэлии хааман киирбит спортсменнары Саха Өрөспүүбүлүкэтин физическэй култуураҕа уонна спорка миниистирин 1-кы солбуйааччы Гаврил Мохначевскай тыл этэн эҕэрдэлээтэ.

Сүрүн судьуйа Альберт Трофимов түмүгү иһитиннэрдэ. Дьокуускай куорат түмсүүлээх хамаандата дуобакка, саахымакка, аэробикаҕа – бастакы, ГТО нуормаларын туттарыыга, буулдьанан ытыыга – иккис, хабылыкка-хаамыскаҕа, чэпчэки атлетикаҕа үһүс миэстэлэрдээх, барыта 10 кыайыы очколаах бастаата. Чэпчэки атлетикаҕа – бастакы, хабылыкка-хаамыскаҕа – иккис, ГТО туттарыытыгар, волейболга үһүс миэстэлэрдээх, 18 кыайыы очколаах Мэҥэ Хаҥалас хамаандата уопсай түмүккэ иккис буолла. Буулдьанан ытыыга – бастакы, остуол тенниһигэр – иккис, саахымакка үһүс үчүгэй көрдөрүүлэрдээх, 23 кыайыы очколаах Таатта үһүс бириистээх миэстэлэннэ.

Наҕараадалары Саха Өрөспүүбүлүкэтин физическэй култуураҕа уонна спорка миниистирин 1-кы солбуйааччы Гаврил Мохначевскай, Саха Өрөспүүбүлүкэтин Дьахталларын сойууһун бэрэссэдээтэлэ Анжелика Андреева, М.К. Аммосов аатынан ХИФУ бэрэсидьиэнэ Евгения Михайлова туттартаатылар.

Уус Алдан волейболга – бастакы, аэробикаҕа уонна саахымакка үһүс миэстэлэрдээх, 30 кыайыы очколаах – төрдүс; Бүлүү чэпчэки атлетикаҕа – иккис, аэробикаҕа – үһүс, 31 кыайыы очколаах – бэһис; Чурапчы дуобакка – үһүс, 31 кыайыы очколаах – алтыс; Ньурба хабылыкка-хаамыскаҕа уонна остуол тенниһигэр бастакы миэстэлэрдээх, 32 кыайыы очколаах – сэттис; Нам – ГТО туттарыытыгар бастакы, дуобакка – иккис, 32 кыайыы очколаах – ахсыс; Сунтаар буулдьанан ытыыга, остуол тенниһигэр – үһүс, 36 кыайыы очколаах тохсус миэстэлэннилэр.

Кыайыылаах уонна бириистээх миэстэлэргэ тиксибиттэргэ Кубоктар, өйдөбүнньүк мэтээллэр, дипломнар, номинациялар кыайыылаахтарыгар махтал суруктар, бириистэр туттарылыннылар. Горнай улууһун Маҕараһыттан 79 саастаах “Саамай аҕам саастаах” номинация кыайыылааҕа Мария Кудаисова биир да спартакиаданы көтүппэккэ кыттыбыта хайҕаныан, холобурга сылдьыан сөп. Тоҕус оҕо ийэтэ, отуттан тахса сиэн, хос сиэн эбэлэрэ билигин да илиитин харытынан үлэлээн, сүөһү иитэн, сиэннэрин иҥэмтэлээх аһынан күндүлээн, нэһилиэгин, улууһун киэн туттуута.

Спорт дьону биир сыалга-сорукка түмэр сыралаах үлэ. Биир эрэ күннээх түбүк буолбатаҕа өйдөнөр. Спартакиада уон сыл тохтобул кэнниттэн Саха Өрөспүүбүлүкэтин физическэй култуураҕа уонна маассабай спорка управлениетын (нач. Оконешников Р.И.) көҕүлээһининэн тэрилиннэ.

“Ааспыт сыллары кытта тэҥнээтэххэ, спорт биирдиилээн көрүҥнэригэр хамсааһын, сайдыы барбыта харахха быраҕыллар. Аэробика улаханнык киэргэттэ. Сахалыы остуол оонньуулара хабылык-хаамыска бырагыраамаҕа саҥа киллэрилиннэ. Конкуренция олус күүстээх. Тохтоон хаалбакка уһуннук, кичэллээхтик бэлэмнэммиттэр ситиһиилэннилэр, кыайыы көтөллөннүлэр. Холобур, волейболга урут подачанан кыайсар эбит буоллахтарына, билигин мээчиги түһэрбэттэр, мээчик кэлэ турар. Оонньуулар уһуулларын иһин, 15 очкоҕа диэри кылгатан биэрдибит. Остуол тенниһигэр оонньуу техникатын эмиэ сүрдээҕин баһылаабыттар. Быһыллыбыт мээчик эмиэ эриллэн, төттөрү кэлэр. Спортсменкалар чэпчэки быһыылаахтар-таһаалаахтар, кыраһыабайдар, оонньуур көрүҥнэрин  үчүгэйдик баһылаабыттар. Азаартаах оонньуулар буоллулар. Кэлэр спартакиада түөрт сылынан буолуоҕа”,– диир отуттан тахса сыл судьуйалаабыт Альберт Иванович Трофимов.

Хамаандаларга өрөспүүбүлүкэ күүстээх спортсменкалара төрөөбүт улуустарын чиэһин көмүскээтилэр. Остуол тенниһигэр бастаабыт Ньурба теннисистэрэ Нюта Ноговицына уонна Сахаайа Карпова табыллан оонньоотубут диэн үөрүүлэрин үллэһиннилэр. Бэйэлэрин бөлөхтөрүгэр Чурапчы хамаандатын 2:1 хотоннор, санаалара бөҕөргөөбүт. Кэнники киирсиилэригэр эрэллээхтик оонньообуттар. Финал аҥаарыгар Мэҥэ Хаҥалас хамаандатын баһыйбыттар. Финалга үчүгэй бэлэмнээх күүстээх таатталары кыайбыттар.  Онон үөрүүлэрин кистээбэттэр. Эрдэттэн бэлэмнээх, илиибитин ыһыктыбакка дьарыктаммыт буоламмыт, бэйэбитигэр эрэллээх этибит дииллэр. Сахаайа Карпова  25-с сылын үлэлиир нолуок сулууспатыгар Уһук Илин чөмпүйүөҥкэтэ, Арассыыйаттан боруонса мэтээллээх, Саха сирин бэтэрээннэрин муҥутуур чөмпүйүөҥкэтэ. Нюта Ноговицына өрөспүүбүлүкэ оҕолорун икки төгүллээх абсолютнай чөмпүйүөҥкэтэ, маастарга хандьыдаат. Тренердэрэ Аркадий Егорович Афанасьев уонна спорт маастара Василий Иванович Румянцев. Онон уопуттаах теннисискэлэр.

Суолта биэрэн, эрдэттэн эрчиллэр-бэлэмнэнэр түмсүүлэри оҥорбуттар хатыһыылаах күрэхтэһиилэргэ ситиһиилэннилэр, кыайдылар. Спартакиада чөл, чэгиэн-чэбдик олох кэрэһитинэн буолла. Саха сирин спордун историятыгар өссө биир чаҕылхай страница эбилиннэ.

Хаартыска: Ааптар түһэриилэрэ