Элбэх оҕолоохтор сирдэрэ

СӨ Баайга-дуолга уонна  сир сыһыаннаһыыларыгар министиэристибэтэ иһитиннэрэринэн,  элбэх оҕолоох ыаллар куорат уокуругун эбэтэр муниципальнай тэриллии территориятыгар 5 сылтан итэҕэһэ суох  олорор  буоллахтарына сир учаастага бэриллиэхтээх.

Бу барыта СӨ Сир кодексатыгар сурулла сылдьар. Дьокуускай куорат Сир сыһыаннаһыыларыгар агентствотыгар кэпсээбиттэринэн,  элбэх оҕолоох ыаллар  биэс сылтан итэҕэһэ суох  Дьокуускай куоракка олороллорун мэктиэлиир докумуоннаах  буоллахтарына эрэ, сир учаастагынан хааччыллаллар. Онуоха  Үлэ киниискэтин куоппуйата (үлэни биэрээччи бигэргэтиэхтээх), оҕолоох дьон оҕолоро үөрэнэр сирдэриттэн ыспараапка,  биитэр хамсаабат баай-дуол  быраабын биир кэлим судаарыстыбаннай реестриттэн выписка туоһу буолуохтаахтар. Бу  докумуоннар суох буоллахтарына, 5 сылтан итэҕэһэ суох  Дьокуускай куоракка олорбутун туһунан информацияны суут нөҥүө бигэргэтиэххэ сөп.