Дьокуускайга «Олоххо тиэрдэр 10 000 атыл» аахсыйа буолан ааста

Киин куоракка Аан дойдутааҕы сүрэх уонна Бүтүн Арассыыйатаҕы хаамыы күннэринэн «Олоххо тиэрдэр 10 000 атыл» хаамыы аахсыйата буолан ааста.
Тэрээһини үөрүүлээхтик арыйыыга СӨ физическэй култуураҕа уонна спорка миниистирэ Леонид Спиридонов, Дьокуускай куорат баһылыгын бастакы солбуйааччы Георгий Гаврильев, СӨ физическэй култуураҕа уонна спорка управлениетын салайааччыта Роман Оконешников, СӨ Олимпийскай сэбиэтин бэрэсидьиэнэ, Олимпийскай чемпион, ССРС спордун үтүөлээх маастара, Арассыыйа физическэй култууратын үтүөлээх үлэһитэ Павел Пинигин, «Трезвая Якутия» уопсастыбаннай хамсааһын салайааччыта, «Стимул» хаалыктаах хаамыы кулуубун салайааччыта Матвей Лыткин кыттыыны ыллылар.

Матвей Лыткин бэлиэтээбитинэн, ханнык баҕар дойду сүрүн баайынан кини норуотун доруобуйата буолар.
«Биһиги куораппытыгар хаамыынан дьарыктанааччы киһи ахсаана сыллата элбии турар. «Олоххо тиэрдэр 10 000 атыл» аахсыйа онуоха биир сүрүн көҕүлээччи. Маннык тэрээһиннэргэ куорат Олохтоох дьаһалтатын үлэһиттэрэ көхтөөх кыттыыны ылаллара үөрдэр. Бүгүҥҥү аахсыйа кыттыылаахтара улахан күүс-сэниэ мунньуммуттарыгар эрэнэбин», – диэтэ «Стимул» хаамыы кулуубун салайааччыта Матвей Лыткин.
Бу күн көхтөөх кыттыыччыларга наҕараадалар туттарылыннылар, диэн иһитиннэрэр Олохтоох дьаһалта пресс-сулууспата. 

Хаартыска: Олохтоох дьаһалта пресс-сулууспата